Defensor Públiku Jerál, Câncio Xavier. Imajen Tatoli/Nelson de Sousa

DILI, 12 janeiru 2021 (TATOLI) – Durante tinan 2020, Defensoria Públika fó asisténsia jurídika ka legál ba iha prosesu kazu hamutuk 4,141 iha territóriu.

Hosi númeru kazu ne’e iha prosesu krime 3,406 no sivíl 735 ne’ebé kompostu hosi Defensoria Públika Munisípiu Dili atende kazu krime 1,670 no sivíl 500, Defensoria Públika Baucau atende kazu krime 558 ho sivíl 64, Defensoria Públika Covalima atende kazu krime 935 ho sivíl 38, ho Defensoria Públika RAEOA atende kazu krime 243 ho sivíl 133.

Hosi kazu krime ho númeru aas mak ofensa integridade fízika simples, violénsia doméstika ho forma ofensa (ne’ebé fen ho la’en baku malu), kontra bandu, ofensa integridade agravadu ba kazu ho númeru natoon mak, maus tratu, abuzu seksuál ba menór, korrupsaun ho sira seluk.

Ba kazu sivíl ho númeru aas mak asaun reivindikasaun propriedade (problema rai), regulasaun podér paternal, kontratu (fó empresta osan), direitu obrigasaun família ho seluk tan.

Defensór Públiku Jerál, Câncio Xavier, hateten hosi númeru prosesu ne’e servisu defensoria fó ona asisténsia legál iha prosesu judisiál iha Tribunál.

“Hosi kazu sira ne’ebé servisu defensoria atende balun iha ona tránzitu julgadu, arkiva, arkiva temporáriu (ne’ebé desizaun tun ona, maibé sei iha rekursu), arkivamentu permanente no balun ninia prosesu julgamentu kontinuasaun lao hela,’’ Câncio Xavier hateten ba Agência TATOLI, ohin, iha nia servisu fatin, Dili.

Servisu defensoria hanesan servisu sosiál fó asisténsia jurídika, judisiáriu no extra-judisiál ne’ebé garante iha artigu 135 Konstituisaun Repúblika Demokrátika Timor-Leste ne’ebé esensiál hodi salva guarda direitu lejítimu sidadaun sira.

Daudaun tuir estatístika dadus kumulativu hosi Defensoria Públika Dili, Baucau, Covalima ho RAEOA rejista kazu pendente foun ne’ebé mai hosi tinan 2020 ho kazu krime 3,406 no sivíl 703.

“Kazu sira ne’e rejista foun ne’ebé kada loron tama ne’ebé ninia oráriu julgamentu marka hotu ona iha tinan ne’e atu hala’o julgamentu iha Tribunál,” hateten Defensor Públiku Jerál, Câncio Xavier.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here