Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen TATOLI/António Gonçalves

DILI, 18 janeiru 2021 (TATOLI) – Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, informa  prosesu adezaun Timor-Leste nian ba ASEAN iha ona lampu verde maibé kestaun tempu.

“Levantamentu loos ona, reuniaun virtuál rua no ekipa Sekretariadu ASEAN nian mai haree direita iha ne’e dala ida, agora ita hein hela resposta kona-ba pilár ekonomia nian mak seidauk mai. Kuandu mai ona mak ita foin hatene asaun saida mak ita atu halo,” hateten  Ministra Adaljiza Albertina Xavier Reis Magno, hodi responde Agéncia TATOLI, ohin, iha Ministériu Finansas, Dili.

Notísia Relevante : Governu Kontinua Hadi’a Pilar Ekonomia Hodi Adere ba AZEAN

Kona-ba asuntu ne’e, Ministra Adaljiza Magno e mós esforsu ko’alia ho nia omólogu Ministru Negósiu Estranjeiru ASEAN nian nune’e bele buka sira-nia apoiu ba Timor-Leste nia adezaun.

“Ha’u mós ko’alia ona ho omólogu balu MNEK hosi nasaun sira membru ASEAN hotu, sira suporta nafatin, maibé kestaun ba tempu, ida ne’e mak sira hatete mai ita, entaun ita sei hein hela rezultadu pilár ekonomia nian no sira mós hakarak atu mai diretamente halo levantamentu  dadus ba pilár ekonomia no kulturál,” nia dehan.

Governante ne’e hatutan, Timor – Leste sei halo mós servisu maka’as hodi prepara aan di’ak liu bainhira sekretariadu ASEAN fó ona resposta ba pilár ekonomia.

Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here