Ministru Prezidensia Konsellu Ministru no mos Ministru Koordenadór Asuntu Ekonómiku, Fidelis Manuel Leite Magalhães. Imajen/Antonio Goncalves

DILI, 17 juñu 2020 (TATOLI)-Ministru Koordenadór ba Asuntu Ekonómiku (MKAE), Fidelis Magalhaês, hateten Governu Konstitusionál daualu sei kontinua esforsu hodi hadi’a iha pilár ekonomia nune’e bele suporta preparasaun Timor-Leste nian atu adere ba Organizasaun AZEAN.

“Ita nia integrasaun ba iha AZEAN iha pilár ekonómika nian esforsu barak mak ita halo entre AZEAN ho organizasaun mundiál komérsiu ne’e iha sinazia ligasaun normal, entaun ita tenke haree ba ita-nia lei sira ne’ebé hola parte mós iha medida sira ne’ebé Ministériu Negósiu Estranjeiru no Kooperasuan foti liu-liu iha área ekonomia nian,” dehan Ministru Fidelis ba jornalista sira iha Palacio do Governo Dili, ohin.

MNEK kria ona organizasaun ida hanaran TILAMP ho esforsu hodi konsentra  ba preparsaun iha setór hotu ba aselera adezaun Timor-Leste nian ba Organizasaun The Assosiation South East Asean Nations.

“Iha TILAMP ne’e MKAE hola kna’ar ida pro-ativu tebes iha organizasaun ne’e nia laran, ne’ebé foinlalais misaun ida mai halo verifikasaun iha Timor-Leste kona-ba asuntu ne’e MKAE mós ko’alia ho sira halo aprezentasaun lubuk ida mak hanesan ambitu investimentu iha ita-nia nasaun no posibilidade atu hametin liután kooperasaun iha setór ekonomia nian,” tenik Governante.

Kona-ba daudaun ne’e Timor-Leste adopta sistema merkadu livre sei afeta ba  adezaun iha AZEAN, Governante ne’e tenik tan sei la fó impaktu tanba Timor-Leste durante ne’e adopta ona sistema merkadu livre.

“Laiha problema ba Timor nia membership hodi partisipa iha organizasaun sira ho natureza nune’e tanba pontu prinsipiu Timor-Leste nia ekonomia ne’e hahú nanis ona ho nakloke,”dehan Fidelis.

“Nasaun bloku sosialista sira iha situasaun ne’ebé diferente hanesan Vietname sira bainhira foin ukun an harii merkadu ne’ebé la’ós liberal maibé sira nia hakarak atu tama iha organizasaun sira hanesan AZEAN primeiru sira koko oinsá hamamar kontrolu estadu nian, ita nian laiha no kontrariu fali hodi haree Timor-Leste nian interese mak ida ne’ebé,” nia esplika

Governu maka tenke kria polítika  komersiál ba produsaun ai-han iha rai-laran no oinsá mós hametin ligasaun ho nasaun membru sira seluk.

“Ita nia mehi atu prodúz iha independensia alimentár maibé ita loke tomak de’it ba ai-han ne’ebé mak tama hosi rai-li’ur entaun lá fó insentivu ba produsaun ita nian rasik, ne’ebé Timor nian la’ós atu halo mamar kontrolu estadu nian maibé atu tau regra ne’ebé di’ak atu fó benefisiu ba Timor-Leste,” nia hateten.

Governante ne’e dehan preparasaun Timor-Leste nian daudaun ne’e di’ak ona iha área hotu hotu kompara ho istoria nasaun membru seluk bainhira atu tama organizasaun ne’e iha kondisaun ida defisil.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here