Antonio Kalohan, Angelina Sarmento, no Luis Roberto. Imajen/Doc. Tatoli.

DILI, 11 janeiru 2020 (TATOLI)—Parlamentu Nasionál (PN), ohin, autoriza deputadu na’in-rua (2) no deputada ida (1) hodi ba presta deklarasaun iha Ministériu Públiku (MP).

Reprezentante povu na’in-tolu ne’e mak hanesan deputadu António da Conceição hosi bankada Partidu Demokrátiku (PD), Luis Roberto da Silva hosi bankada KHUNTO no deputada Maria Angelina Lopes Sarmento hosi PLP tanba fiskalizadór no lejizladór na’in-tolu atu presta deklarasaun iha Ministériu Públiku nu’udar sasin.

Prosesu votasaun ba levantamentu imunidade ne’e dala-tolu ba deputadu na’in-tolu ne’e ho rezultadu votasaun ba deputadu António da Conceição a-favór 55, kontra 1 no abstensaun 6.

“Ho nune’e distintu deputadu António da Conceição autorizadu atu presta deklarasaun nu’udar sasin iha Ministériu Públiku iha 13 janeiru, hela loron rua tán,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária, Parlamentu Nasionál.

Prokuradór Jerál Repúblika (PJR), José da Costa Ximenes, haruka karta ba Prezidente Parlamentu Nasionál, Deputadu Aniceto Longuinhos Guterres Lopes iha loron 18 dezembru 2020 ho asuntu “husu halo prosesu levantamentu imunidade ba deputadu António da Conceiçao” nian.

Ho pedidu ida-ne”e, Prezidente Parlamentu Nasionál baixa ba Komisaun A (Justisa no Konstitusional) iha loron 05 janeiru 2021. Deputadu Kalohan sei presta deklarasaun nu’udar sasin iha loron 13 janeiru 2021, tuku 09.00, iha ámbitu prosesu prosesu NUC.007/19.CACTL, iha Gabinete Sentrál Kombate Korrupsaun no Kriminalidade Organizada.

Parlamentu Nasionál la pronúnsia motivu nu’udar sasin ba kazu saida loos.

Nune’e mós Parlamentu Nsionál hasai imunidade ba Vise-Prezidente Parlamentu Nasionál, Deputada Maria Angelina Lopes Sarmento, ho rezultadu votasaun a-favór 56, kontra 1, abstensaun 4 no nulu 1.

Nune’e, Deputada Bankada PLP ne’e preparadu sai sasin iha Ministériu Públiku bainhira simu notifikasaun tanba data ba presta deklarasaun seidauk iha maibé liuhosi karta eskrita.

Entretantu, Parlamentu Nasionál mós hasai imunidade ba Vise-Prezidente Parlamentu Nasionál, Deputadu Luis Roberto da Silva, ho rezultadu votasaun a-favór 56, kontra 1, abstensaun 4 no nulu 1.

Nune’e, Deputadu Luis Roberto da Silva preparadu presta deklarasaun iha Ministériu Públiku bainhira simu lihusi karta eskrita.

Vise-Prezidente na’in-rua sai sasin ba destituisaun meza ne’ebé akontese iha loron 18 no 19 maiu 2020 liubá, ho prosesu NUC.0035/20.PGGCC.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here