Estrutura INTL simu pose, iha kinta (14/01), iha Palásiu Governu. Imajen TATOLI/Egas Cristovão

DILI, 14 janeiru 2021 (TATOLI)–Ministru Prezidénsia Konsellu Ministru (PCM, sigla portugés), Fidelis Manuel Leite Magalhães, fó posse ba Prezidente Konsellu Diretivu Imprensa Nasionál Timor-Leste, Institutu Públiku (INTL,I.P), Jaime Fernando dos Mártires Carvalho Correia.

Nune’e mós, fó pose ba membru Konsellu Diretivu, kompostu hosi Vise-Prezidente no Vogál, Beatriz Ximenes Martins no Vogál, Elídio da Cruz de Carvalho no Fiskál Úniku, Natalino Auxiliadora de Deus.

Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristovão

“Dezeju kontinuasaun serbisu di’ak ba emposadu sira, ha’u hatene serbisu ne’ebé antes ne’e imi (emposadu) halo durante iha instituisaun ne’e, tanba ne’e husu hala’o serbisu ho profisionalizmu a’as,” Ministru Fidelis hateten iha ámbitu seremónia pose ne’ebé hala’o iha salaun PCM, Palásiu Governu, kinta ne’e.

Notísia Relevante: Jaime Correia nomeadu nu’udar Prezidente Konsellu Diretivu INTL, I.P

Iha fatin hanesan, Prezidente INTL Jaime Correia, agradese tanba hetan fiar hodi lidera instituisaun Estadu ne’e no promete serbisu di’ak hodi serbí Estadu durante mandatu.

Ministru Prezidénsia Konsellu Ministru, Fidelis Manuel Leite Magalhães, fó pose ba Konsellu Diretivu INTL, Jaime Fernando dos Mártires Calvalho Correia. Imajen TATOLI/Egas Cristovão

“Ha’u sente kontente hetan fiar hosi Governu atu lidera empresa nasionál, ne’ebé antes ne’e ha’u nu’udar diretór. Ha’u bele dehan katak knaar ne’e la’ós kama’an maibé todan tebes tanba ami foin mak hahú, ami hasoru difikuldade barak liuliu rekursu umanu hanesan pesoál operadór mákina, nune’e mós iha infraestrutura hanesan laiha espasu naton hodi hala’o serbisu,” nia dehan.

Maski hasoru difikuldade sira ne’e, maibé responsável ne’e dehan ho rekursu natón ne’ebé iha hamutuk ho vogál sira bele halo serbisu.

Antes ne’e, Governu liuhosi reuniaun Konsellu Ministru, deside nomea Jaime Correia, asume kargu ne’e ba mandatu tinan-haat.

Nomeasaun ne’e liuhosi projetu rezolusaun Governu, ne’ebé aprezenta hosi Ministru Prezidénsia Konsellu Ministru.

INTL antes ne’e koñesidu hanesan Gráfika Nasionál ne’ebé tutela iha Prezidénsia Konsellu Ministru.

Jornalista: Antónia Gusmão

Editora: Julia Chatarina 

HAKEREK NO HATÁN

Please enter your comment!
Please enter your name here