Prezidente Konsellu Diretivu INTL, I.P nomeadu, Jaime Fernando dos Mártires Carvalho Correia. Imajen/Jaime

DILI, 16 dezembru 2020 (TATOLI)–Governu liuhosi reuniaun Konsellu Ministru (KM), deside nomea Jaime Fernando dos Mártires Carvalho Correia, nu’udar Prezidente Konsellu Diretivu Imprensa Nasionál Timor-Leste, Institutu Públiku  (INTL,I.P) ba mandatu tinan-haat.

Nomeasaun ne’e liuhosi projetu rezolusaun Governu, ne’ebé aprezenta hosi Ministru Prezidénsia Konsellu Ministru, Fidelis Manuel Leite Magalhães.

“Ha’u rasik aprezenta rezolusaun ne’e no aprovadu iha Konsellu Ministru,” Ministru Fidelis relata hafoin ramata reuniaun KM iha Palásiu Governu, kuarta ne’e.

INTL,I.P antes ne’e koñesidu hanesan Gráfika Nasionál tutela iha Prezidénsia Konsellu Ministru.

“Inisiativa ne’e hanesan faze hosi esforsu Governu atu harii Imprensa Nasionál hanesan institutu públiku”, nia akresenta.

Portavóz Governu ne’e haktuir, INTL,I.P antes ne’e estabelese ona maibé seidauk formaliza no Jaime Correia asume knaar nu’udar Diretór.

“Atu fasilita no formaliza estabelesementu institutu públiku ne’e, em vez de ba buka fali ema seluk hosi fatin seluk ne’ebé laiha esperiénsia, entaun ha’u rasik propoin atu mantein Señor Jaime nu’udar prezidente tanba nia iha esperiénsia barak no tinan barak ona iha administrasaun públika,” nia informa.

Ministru sublinña, hafoin nomeasaun prezidente, ministériu tutela sei halo koordenasaun ho institutu nasionál ne’e atu kompleta estrutura.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here