Ministru Transporte no Komunikasaun, José Agostinho da Silva. Imajen TATOLI/Egas Cristovão

DILI, 13 janeiru 2021 (TATOLI)— Ministru Transporte no Komunikasaun, José Agostinho da Silva, hateten Governu Timor-Leste iha responsabilidade atu ajuda umanitária aviaun ho marka VH-ILJ hosi Austrália atu transporte pasiente pozitivu COVID-19 hosi Jakarta, Indonézia atu transporta bá Brisbane, Austrália hodi halo tratamentu.

Iha tersa (12/01), tuku 17:30, aviaun ne’e tun iha Aeroportu Internasionál Prezidente Nicolau Lobato, Comoro, Dili, atu enxe avtur (mina), atu kontinua semo bá  Austrália, maibé roda nakfera fali.

“Hafoin aviaun ne’e enxe avtur no atu kontinua viajen maka roda nakfera, entaun difikulta viajen. Insidente hanesan ne’e, ita iha resposabilidade atu fó ajuda umanitária, liuliu asegura sira,” Ministru José Agostinho, hateten hafoin partisipa iha enkontru Konsellu Ministru iha Pálasiu Governu, kuarta ne’e. 

Notísia Relevante: Aviaun VH-ILJ Austrália tula pasiente COVID-19 asidente iha aeroportu Comoro

Nune’e, Governante ne’e haktuir, horikalan ekipa hosi Autoridade Nasionál Aviasaun Timor-Leste (ANTL) no ekipa hosi Ministériu Saúde asegura tanba tula hela pasiente COVID-19.

Aleinde ne’e, Governu Timor-Leste halo ona kontaktu ona ho Embaixada Austrália iha Timor-Leste hodi hamutuk bele fasilita pasiente bele kontinua viajen ba Brisbane, Austrália.

“Ita-nia ekipa Ministériu Saúde no Ministériu Interiór, hamutuk ona atu haree asegura pasiente ne’e no pilotu aviaun, tanba haree posibilidade bele lori ona ba sala izolamentu hafoin, parte Austrália mai transporta,” nia akresenta. 

Aviaun ne’e atu transporta diplomata ka ofisiál organizasaun Programa Ai-han mundiál (WFP), ne’ebé mak sofre moras COVID-19.

Hafoin hetan autorizasaun hosi autoridade Timor-Leste, aviaun ne’e tun emerjénsia no konsege enxe duni mina, maibé atu semo fali mak mosu insidente roda aviaun nakfera no la konsege halo viajen.

Daudaun ne’e pilotu aviaun, pasiente COVID-19 na’in-ida, hamutuk ho médiku  iha hela Aeroportu Comoro.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here