Treinamentu manuá ka matadalan implementasaun Uma Kbiit Laek (UKL) ba Diretór Delagasaun PNDS hosi munisípiu 12 iha salaun CNE, Colmera, Dili. Imajén TATOLI/Osória Marques.

DILI, 13 janeiru 2021 (TATOLI)—Ministériu Adminsitrasaun Estatál liuhosi Programa Nasionál Dezenvolvimentu Suku (PNDS), ohin, fó treinamentu kona-ba matadalan implementasaun “Uma Kbiit Laek” (UKL) ba Diretór Delegasaun (DD) PNDS hosi munisípu 12 kona-ba oinsá mak uza manuál implementasaun ba Uma Kbiit Laek (UKL) iha territóriu Timor-Leste.

Notísia Relevante: Semana oin, Governu sensibiliza programa konstrusaun “Uma Kbiit Laek” ba komunidade

Diretora PNDS, Claudina Soares Pinto, hateten objetivu hosi treinamentu ne’e atu kontinua fó hanoin ba Diretór Delegasaun (DD) munisipál sira hodi oinsá mak bele implementa atividade Uma Kbiit Laek nian iha terrenu ho di’ak liu.

“Ohin, ita fó treinamnetu ba ita-nia Diretór Delegasaun (DD) iha munisípiu 12 la inklui ho Rejiaun Adminstrativa Espesiál Oé-Cusse Ambeno (RAEOA), hodi aumenta sira-nia hanoin relasiona ho manuál implementasaun ba Uma Kbiit Laek (UKL) nian. Programa ka atividade ne’e foun hosi programa PNDS nian, ne’ebé mak atu implementa iha tinan ne’e. Tanba ne’e mak ha’u husu, para ita tenke iha koñesimentu ne’ebé mak klean ba manual ne’e rasik, bainhira implementa konstrusaun Uma Kbiit Laek ne’e,” Claudina Soares Pinto hateten ba Agência TATOLI hafoin halo abertura treinamentu kona-ba manuál implementasaun ba Uma Kbiit Laek, iha salaun Komisaun Nasionál Eleisaun (CNE, sigla portugés), Colmera, Dili, kuarta ne’e.

Diretora ne’e haktuir, ohin, ekipa destakadu PNDS iha Rejiaun Administrativa Eespesiál Oé-Cusse Ambeno (RAEOA) labele partisipa iha treinamentu refere tanba situasaun pandemia COVID-19 ho Estadu Emerjénsia (EE).

Treinamentu ne’ebé hala’p durante loron rua (2) ne’e, nia informa, hahú ohin to’o aban (12-13/-1/2021) ne’e, atu haktuir faze sosializasaun ba nível munisípiu sira no atu nune’e sira tenke iha koñesimentu di’ak ona para bele implementa programa foun UKL nian ba to’o iha munisípiu, postu administrativu, suku no aldeia.

Tuir nia, iha treinamentu refere iha materia prisipál tolu mak PNDS oferese ba DD munisipál sira mak hanesan materia sosiál, finansa no parte tékniku nian. Tanba ne’e, nia dehan, iha loron rua nia-laran ne’e partisipante sira tenke iha intensivu atu akompaña tanba materia ne’e liga direta ba servisu atividade foun UKL nian iha terrenu.

“Kona-ba materia sosiál ne’e mak oinsá ita atu define kbiit laek ne’ebé mak atu bele iha  futuru, sai na’in ba uma ne’ebé mak ita atu harii. Agora kona-ba finansa nian mak mekanizmu oinsá mak komunidade foti osan no deskrisaun ba kada uma ne’e oinsá, depende tipu ne’ebé mak ita iha,” nia dehan.

Kona-ba materia tékniku nian, nia hatutan, presiza tebes koñesimentu kona-ba tékniku ne’e, tanba PNDS nia planu ne’e mak aplika UKL ho medellu ida de’it maibé ninia medida mak la hanesan tanba haree ba benefisiáriu ne’e rasik nia kondisaun.

Diretora ne’e hatete, bainhira atu implementa iha terrenu, PNDS tenke la’o tuir siklu 12 ne’ebé mak prepara ona.

“Entaun iha loron 19 janeiru tinan ne’e, ita-nia ekipa hotu-hotu sei tun ba teerenu hodi halo sensibilizasuan ba nível munisípu depois iha loron 20 no 21, ita kontinua refreshing traning ba ekipa destaku PNDS nian iha munisípiu sira hotu,” nia dehan.

Banhira refereshing traning mak ramata, nia dehan, PNDS sei kontinua ba nível suku nian atu esplika ba sira oinsá implementa UKL ne’e, hafoin mak deside no hili ekipa verifikasaun benefisiáriu elizivel ne’ebé mak sei involve ho konsellu suku, juventude, lia-na’in, veteranu inklui parte ingreja nian.

Aleinde ida ne’e, nia husu ba Diretór sira atu fó atensaun másimu ba materia matadalan UKL nian hodi bele implementa iha terrenu ho di’ak no susesu.

Kona-ba sensibilizasaun, Claudina Soares Pinto haktuir, alvu dahuluk mak xefe suku sira tanba sira mak bele halo sensibilizasuan informasaun kona-ba UKL nian ba komunidade sira no mós Polisía Nasionál Timor Lorosa’e (PNTL).

“Ita mós fó ona koñesimenut ba polisía no Autoridade Munisipál sira katak ami organizadu ona atu halo sensibilizasaun. Tanba ita hotu hatene katak agora ita iha situasaun EE ba pandemia COVID-19, tanba ne’e presiza mós halo prevensaun ba no halo distansiamentu no uza máskara,” Claudina hatete.

Nia dehan, importante mak tenke kumpre nafatin regra protokolu Ministériu Saúde nian ne’ebé mak fó sai ona.

Entretantu, Reprezentante PARTISIPA, Asesor Implementasaun Programa, Alvaro Ribeiro afirma katak PARTISIPA komprometida atu kontinua apoiu nafatin implementasaun PNDS no Aktividade implementasaun UKL no reabilitasaun sede suku sira hotu iha territóriu TL.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here