DILI, 13 janeiru 2021 (TATOLI) – Federasaun Futeból Timor-Leste (FFTL) fó sansaun disiplinár ba jogadór na’in-rua; Edit Savio hosi Boavista FC Timor ho Osvaldo Belo hosi Lalenok United FC tanba sira nain-rua la hatudu disiplina iha sosiedade no iha kampu laran.
Sekretáriu Jerál FFTL, Nelio Isaac Sarmento, hateten jogadór na’in-rua ne’e sei la tama iha selesaun nasionál kategoria senior nian atu ba joga iha Suzuki Cup 2021.
“Jogadór selesaun nasionál na’in-rua mak FFTL hapara provizóriu tanba sira nia aan rasik la hatudu disiplina iha sosiedade no jogu laran,” informa Nelio Isaac Sarmento, ohin, ba jornalista sira iha edifísiu FFTL, Dili.
Notísia Relevante : Edit Savio kontinua reforsa Boavista FC Timor
Tuir relatóriu FFTL nian katak Edit Savio hetan sansaun tanba nia baku arbitru iha jogu Nino Konis Santana ne’ebé hala’o iha Munisípiu Lautem, foin lalais ne’e, no haree ba nia performa iha kopa no tasa 12 Novembru tun maka’as.
Osvaldo Belo ne’ebé antes ne’e joga iha Karketu Dili FC hetan sansaun tanba iha jogu tasa 12 Novembru, foin lalais, hatudu hahalok la di’ak iha kampu-laran la obedese ba regra ka árbitru, sai konforme nia hakarak, tama konforme nia hakarak iha kampu-laran, ida ne’e mak treinadór selesaun nasionál rasik foti desizaun hato’o mai FFTL deside hapara.
“Ida ne’e meiu ida ba sira hodi sente katak sira halo sala,” Nelio Isaac Sarmento hateten.
Eis Sekretáriu Estadu Juventude no Desportu (SEJD) ne’e esklarese katak desizaun ne’ebé FFTL haraik ba jogadór senior na’in -rua ne’e hanesan meiu ida hodi hanorin no bele halo reflesaun ba sira nia aan, nune’e, labele halo tan iha futuru.
“Jogadór tenke hatudu hahalok ne’ebé di’ak, hatudu disiplina ba sosiedade, sira na’in-rua ami hapara ne’e atu hatudu mós ba maluk sira seluk labele halo tuir hahalok hanesan sira na’in-rua nian ne’e,” Nelio hateten.
Edit Savio hanesan jogadór senior ne’ebé sempre defende Timor-Leste iha jogu internasionál saida de’it iha liña oin hanesan jogadór avansadu ho númeru kamijola 9 no Osvaldo Belo mós sempre defende selesaun nasionál iha liña klaran hanesan jogadór médiu ho númeru kamizola 23.
To’o notísia ne’e publika, Agência TATOLI seidauk hetan konfirmasaun hosi jogadór na’in-rua ne’ebé FFTL fó sansaun disiplinár ba sira ho razaun ne’ebé FFTL aprezenta.
Jornalista : Hortencio Sanchez
Editór : Francisco Simões
