Avansadu prinsipál Boavista FC Timor, Edit Savio (9). Imajen/Espesiál

DILI, 13 janeiru 2021 (TATOLI) – Avansadu prinsipál Boavista FC Timor, Edit Savio (9) hateten, époka ne’e nia la sai ba klube seluk hodi mantein nafatin ho Boavista hodi lori ekipa ne’e ba vitória.

Eis jogadór selesaun nasionál ne’e haktuir ba Agência TATOLI liuhosi mensajen WhatsApp, ohin, hateten daudaun ne’e nia halo hela preparasaun individual hodi hadi’a nia fíziku no abilidade hodi bele kontirui prestasaun di’ak ba klube Boavista FC Timor.

“Ha’u sei mantein nafatin iha Boavista,”  hateten jogadór ho naran kompletu Edit Romanos Cristovão Savio, ne’ebé moris iha Munisípiu Lautem, loron 26 agostu 1992.

Esperiénsia

Edit Savio, hahú nia karreira iha 2015 hamutuk ho  klube Aitana FC ne’ebé  sai kampiaun dahuluk ba tasa 12 de Novembru iha tempu ne’ebá.

Haree ba poténsia di’ak hosi jogadór ho altura 170 cm ne’e, klube Carsae iha momentu ne’ebá halo kontratu ho jogadór ne’e hodi reforsa kedan Carsae FC iha 2016.

Bainhira Carsae iha 2017 troka naran ba Boavista FC Timor, Edit Savio nafatin iha Boavista hamutuk ho nia kolega sira hodi reforsa nafatin klube ne’e maski seidauk sai kampiaun ba tasa 12 de Novembru, Liga Futeból Amadora (LFA) no Supertasa.

Iha 2018 Boavista nafatin fó konfiansa ba Edit hodi sai hanesan sniper ka jogadór markadór iha liña oin, la saugati tanba konsege lori Boavista kampiaun dala uluk LFA iha momentu ne’ebá.

Liga komesa lao iha 2019, Assalam halo negosia  ba jogadór ne’e hodi muda ba Assalam, maibé joga de’it iha primeira volta jogadór ne’e deside hodi fila hikas ba Boavista hodi mantein to’o agora.

Edit mós reprezenta Timor-Leste hodi sai hanesan  jogadór ida iha ekipa nasionál hodi ba joga iha estranjeiru.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here