Aviaun Austrália nian ho marka VH-ILJ .Imajen/espesial.

DILI,13 janeiru 2021 (TATOLI)—Prezidente Administração de Aeroportos e Navegação Aérea de Timor-Leste (ANATL),José Trindade da Cruz Pinto,  klarifika katak ANATL la fó autorizasaun no lisensa atu aviaun hosi Austrália tun iha Aeroportu Comoro, maibé autoriza hosi  Autoridade Aviasaun Civil Timor-Leste (AACTL).

“Aviaun hosi Austrália ne’ebé tula pasiente COVID-19 hosi Indonézia atu halo tratamentu iha Austrália, ANATL la fó lisensa atu tun,maibé Autoridade Aviasaun Civil Timor-Leste mak fó autorizasaun,” José Trindade da Cruz Pinto, ba jornalista sira iha Aeroporto Comoro, Dili, ohin.

Notísia Relevante :Aviaun VH-ILJ Austrália tula pasiente COVID-19 insidente iha aeroportu Comoro

José Trindade  esplika, bainhira iha situasaun normál, AACTL  mak  fó autorizasaun no ANATL hanesan operadór ba aeroportu, iha obrigasaun atu haree orariu operasaun aviaun tama no sai iha aeroportu.

Relasiona ho Estadu emerjénsia, nia dehan,  ANATL  hanesan operadór aeroportu  kumpri  maibé  aviaun hosi Austrália VH-ILJ ne’e oin seluk, tanba aviaun ne’e tun la’ós atu halo movimentu iha Timor-Leste, maibé atu husu ense avtur (mina).

“Iha situasaun emerjénsia bainhira sira husu ajuda, ita tenki fó no ita tenki autoriza. Maibé, ha’u dehan dala ida tan autorizasaun ne’e la’ós maihosi ANATL. Maibé, autorizasaun ne’e maihosi AACTL. Kona-ba pasiente COVID-19 ne’e ami laiha koñesimentu  tanba ami autoriza de’it. Aviaun ne’e bele tun tanba nia pedidu ne’e dehan tun semo fali la’ós dehan tun atu hatun pasajeiru no tula fali pasajeiru,” José Trindade haktuir.

Prezidente ANATL ne’e atualiza nafatin katak, aviaun ne’e rasik nia problema maka roda aviaun nakfera, tanba ne’e to’o agora sira seidauk halao fali vou bá Austrália.

“Agora seidauk iha pedidu atu halo evakuasaun ba pasiente ne’e rasik. Horikalan rona informasaun dehan, aviaun ida mak atu mai hodi evakua. Maibé, to’o oras ne’e aviaun seidauk mai,” nia subliña.

ANATL nia preokupasaun maka, aviaun ne’ebé hetan asidente ne’e para loos iha aviaun nia tun no semo fatin, tanba ne’e horikalan kedan fó sai nota ida hodi alerta ba mundu  atu ema sira ne’ebé uza  aeroportu mai Timor karik, labele mai.

“Bainhira to’o tempu, ami sei fó sai fali nota foun mak mai tanba aviaun ne’ebé tula pasiente COVID-19  ne’e nia para loos iha pista aviaun hotu-hotu tun no semo fatin,” nia esplika. 

To’o oras ne’e daudaun,  lider másimu ANATL  ne’e hateten, aviaun ne’e para hela iha pista, maibé para iha ninin  ne’ebé ANATL  rasik sei autoriza de’it ba aviaun lokál sira  no parte operasionál  Aeroportu  sei la autoriza aviaun boot sira.

Jornalista:  Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here