Sekretáriu Estadu Juventude no Desportu (SEJD), Abrão Saldanha, konversa ho Prezidente LFTL, Nilton Gusmão ho Sekretáriu Jerál FFTL, Nelio Isaac Sarmento. Imajen/LFA

DILI, 12 janeiru 2021 (TATOLI) – Iha tinan sira liuba Sekretária Estadu Juventude no Desportu (SEJD) halo transferénsia fundu apoia ba atividade Liga Futeból Amadora (LFA) diretamente ba konta LFA nian, maibé ba tinan 2021, SEJD planeia ona atu transfere fundu ho montante $300,000.00 ba LFTL liuhosi Federasaun Futeból Timor-Leste (FFTL).

Notísia Relevante : 2021, SEJD aloka $300,000-resin ba LFTL

LFTL hanesan órgaun liga ne’ebé harii hosi Governu no  transforma hosi LFA hafoin susesu organiza jogu iha nivel nasionál. Tanba ne’e, sira husu atu SEJD kontinua fó apoiu orsamentu tuir kompromisu antes hodi transfere direita ba konta LFTL nian no la presiza atu tránzita fali liuhosi FFTL.

Prezidente LFTL, Nilton Gusmão, hateten antes ne’e nia parte ko’alia ona ho Prezidente FFTL, Francisco Jerónimo, atu buka meiu adekuadu hodi rezolve mekanizmu tranferensia osan hosi SEJD ba direita LFTL.

Sekretáriu Estadu Juventude no Desportu (SEJD), Abrão Saldanha, simu relatóriu hosi Prezidente LFTL, Nilton Gusmão hafoin re-eleitu ba Prezidente LFTL iha kongresu nasionál LFTL iha Dili, foin lalais ne’e. Imajen LFA/Dok.

“Ha’u ho Prezidente FFTL ko’alia ona sobre asuntu ida ne’e, tanba FFTL hakarak dehan osan ne’ebé apoiu hosi Governu tenke tranzita iha FFTL depois mak haruka fali mai LFTL. Maibé hanesan ita hotu hatene órgaun liga, órgaun ida ne’ebé Governu rasik mak harii hodi organiza ita-nia futeból iha rai-laran, maibé kona-ba asuntu ne’e ha’u hakarak tur hamutuk lai foin diskute hodi haree ba desizaun oinsá,” hateten Nilton Gusmão, ba Agência Tatoli, tersa ne’e, iha nia servisu fatin, Dili.

Prezidente Diretór Esperansa Timoroan ne’e tenik, mezmu nia seidauk tuur hamutuk ho SEJD atu rezolve “sirkuitu” transferénsia osan ne’e, maibé LFTL hei nde’it Governu mak bele pronunsia.

“Kona-ba asuntu ida ne’e mós ha’u seidauk bele fó komentáriu tanba Sekretáriu Estadu Juventude no Desportu (SEJD) seidauk bolu ha’u no ezekutivu liga nian hodi ko’alia. Maibé ami nia pozisaun mak osan na’in mak Governu ami hein de’it Governu mak sei pronunsia buat balu, atu nune’e, ami bele lao tuir planu no hanoin balu Governu atu ezekuta,” nia hateten.

Nia hatutan, tuir orsamentu ne’ebé apoiu hosi Governu ba liga la englobe kustu hotu iha atividade liga nian.

“Atividade liga nian apoiu boot liu mai hosi Governu maibé apoiu komplementáriu barak mai hosi patrosinadór sira mós. Nune’e mak Sekretáriu Estadu dezafia ona ami dehan katak ita tenke iha planu ida katak liga ne’e lao regulármente atu liga ne’e lao ba oin sem apoiu hosi Governu nian. Tuir ha’u hanoin sira ne’e di’ak tanba hanoin sira ne’e atu provoka ita nia kriatividade hodi hala’o atividade sem apoiu Governu nian,” nia haklaken.

Hosi seluk, Sekretáriu Jerál FFTL, Nelio Isaac Sarmento, ba Agência TATOLI,   foin lalais ne’e iha FFTL hateten, iha époka sira liuba Governu transfere osan ba Liga Futeból Timor – Leste (LFTL) diretamente, maibé agora nia la hatene mekanizmu halo transferénsia oinsá.

“Ita hotu hatene katak durante periodu naruk Governu fó osan diretamente ba iha Liga Amadora to’o mai agora Liga Futeból Timor-Leste. Entaun ha’u la hatene loos mekanizmu ida agora ne’e sá intensaun mak Governu hakarak kria orsamentu ba apoiu ne’e nafatin hanesan uluk ka muda ona mekanizmu parseiru Governu nian mak FFTL,” hateten Nelio Isaac Sarmento.

Nia dehan, bainhira Governu nia intensaun hakarak LFTL tenke lao nafatin ba oin tenke iha servisu hamutuk ida ho FFTL no LFTL rasik.

“Kuandu hakarak liga ne’e lao ba oin nafatin ho di’ak, ha’u sujere ba Governu atu bolu FFTL no Liga Futeból Timor – Leste tur hamutuk hodi halo diskusaun ida sobre sá intensaun mak ita bele lori ba oin ne’e ho mekanizmu oinsá,” Nelio tenik.

FFTL mós hetan ona informasaun katak osan $300,000.00-resin ne’ebé Governu atu haraik ba LFTL ne’e ba de’it hala’o atividade. Tanba ne’e tenke haree didi’ak orsamentu ne’e ba selu subsídiu klube ka oinsá, prémiu oinsá no selu ema sira oinsá.

“Hosi mekanizmu sira ne’e hotu mak ita foin hatene osan loloos atu selu ema ne’e hira, tanba FFTL mós iha nia orsamentu própriu ba liga boot liu ida Governu fó ne’e maibé montante pois mak ita haree labele fó sai lai,” nia afirma.

Ba polémika ne’e, Agência TATOLI halo konfirmasaun ho Sekretariu Estadu Juventude no Desportu (SEJD) Abrão Saldanha,  hateten mekanizmu Governu halo transferénsia orsamentu ba LFTL la hanesan ona uluk sei liuhosi FFTL mak ba LFTL.

“Osan ita sei transfere ba FFTL, tau hamutuk ho FFTL nia osan,”  Abrão Saldanha hateten, foin lalais ne’e.

SEJD promete sei konvoka reuniaun parte  tolu; LFTL, FFTL ho SEJD hodi diskute hamutuk buka solusaun ida di’ak.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here