Sekretáriu Estadu Juventude no Desportu, Abrão Saldanha. Imajen Tatoli/ Egas Cristovao

DILI, 04  janeiru 2021 (TATOLI) – Sekretáriu Estadu Juventude no Desportu (SEJD) Abrão Saldanha, informa, Governu  liuhosi SEJD iha tinan foun ne’e aloka osan hamutuk $300,000-resin ba Liga Futeból Timor-Leste (LFTL) hodi realiza jogu ba segunda divizaun no primeira divizaun.

“Kona –ba LFTL nian, ami ko’alia ona ho Federasaun Futeból Timor-Leste (FFTL) atu tau osan hamutuk,” Abrão Saldanha, informa ba jornalista sira, ohin, iha edifisiu SEJD, Dili.

Tinan uluk, Abrão Saldanha hateten, Governu tau $700,000-resin, maibé tinan ida ne’e hatún bá $300,000-resin tanba restu hosi osan ne’e FFTL mak sei kobre.

Bainhira Covid-19 remata SEJD sei tur hamutuk ho órgaun liga atu haree oinsá bele realize liga ne’e lalais ona tanba durante tempu barak liga paradu.

SEJD-UNDP esplora ideia hodi servisu hamutuk

Iha biban seluk no iha fatin hanesan,  Sekretáriu Estadu Abrão Saldanha, hala’o sorumutuk ho UNDP hodi esplora ideia oinsá bele servisu hamutuk iha area juventude nian.

“SEJD ho UNDP halo enkontru ida hodi esplora ideia oinsá mak bele servisu hamutuk ho joven sira iha sentru juventude sira ba projetu sira atu halo ba joven sira liuhosi empreendedorizmu ba joven sira,” Abrão Saldanha hateten.

Nia dehan, UNDP iha esperiénsia servisu kona-bá area sira hanesan ne’e iha nasaun barak iha mundu, nune’e sira hakarak servisu hamutuk ho SEJD hodi haree bá joven sira iha sentru juventude hotu iha territóriu Timor-Leste.

“Diskusaun la’ós to’o iha ne’e de’it. Diskusaun sei la’o nafatin sei involve mós SEFOPE, IADE, Ministériu Turizmu Komérsiu Indústria, BNCTL no seluk tan,  oinsá mak bele hahú projetu servisu ba joven sira iha sentru juventude hotu,” nia relata.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here