Ministru Edukasaun Juventude no Desportu, Armindo Maia. Imajen/Egas Cristovão

DILI, 04 janeiru 2021 (TATOLI)—Governu liuhosi Ministériu Edukasaun Juventude no Desportu (MEJD) anúnsia ba públika hodi suspende temporáriu prosesu aprendizajen no inskrisaun ba estudante iha eskola públiku no privada ba prevene pandemia globál COVID-19.

MEJD foti desizaun hodi suspende atividade letiva ne’e durante semana rua hodi servisu hamutuk ho Ministériu Saúde para halo supervizaun ba  eskola sira.

“Ha’u husu ba komunidade edukativa sira hahú husi eskola públiku no eskola privada sira inklui eskola katólika sira ne’ebé iha fundasaun sira nia mahon, eskola portuguêsa Ruy Cinaty Dili no eskola internasionál sira iha territóriu Timor laran tomak atu suspende lai kualker atividade ensinu aprendizjen ,  atividade inskrisaun no orientasaun ba estudante foun anu letivu 2021 nian hodi hein despaxu tuir mai husi ministerial konjuntu entre MEJD ho MS nian,” Ministru Armindo Maia, ba jornalista sira iha konferénsia imprensa, segunda ne’e iha Caicoli Dili.

Durante semana rua ne’e, Ministériu Edukasaun Juventude no Desportu sei implementa eskola online liuhosi internet, televizaun, radiu no meius komunikasaun seluk ba estudante sira.

“Ami seidauk bele garante liña internet iha programa eskola ba uma tanba OJE 2021 nian maske PR promulga ona maibé seidauk iha desizaun atu ezekuta. Tan ne’e ami seidauk bele garante liña internet online ba estudante sira,” nia hateten.

Maibé Governante ne’e hateten sei buka apoiu husi parseiru sira hanesan UNICEF no seluk tan atu fó apoiu orsamentu ba programa eskola ba uma.

“Suspensaun ne’e sei la lori tempu naruk,” nia dehan. MEJD sei foti filafali desizaun hafoin semana rua ne’e nia laran.

Jornalista : Tomé Amado

Editór :Agapito dos Santos

1 KOMENTÁRIU

HAKEREK NO HATÁN

Please enter your comment!
Please enter your name here