Diretór Jerál Servisu Rejistu Notariadu, Crisogno da Costa Neto. Imajen Tatoli/Egas Cristovão

DILI, 17 dezembru 2020 (TATOLI)-Ministériu Justisa (MJ) liuhosi Diresaun Jerál Servisu Rejistu Notariadu (DGSRN)  simu pedidu inskrisaun hosi partidu foun haat, kompostu hosi Partidu Fitun, Patifor, Partidu Dezenvolvimentu Sosiál no Partidu Os Verdes.

Diretór Jerál Rejistu Notariadu, Crisogno da Costa Neto, hateten, hosi partidu haat ne’e partidu Fitun mak sira-nia parte  konklui ona verifikasaun hodi enkamiña relatóriu ba ministru tutela. Nune’e, Ministru Justisa, Manuel Cárceres da Costa,  hatún ona despaxu ba Diresaun Jerál Servisu Rejistu Notariadu (DGSRN).

Ba Agência Tatoli, ohin, iha edifísiu Ministériu Justisa, Dili, Crisogno da Costa Neto informa, hosi rezultadu  verifikasaun ne’e DGSRN sei konvida fila-fali  partidu Fitun  atu entrega despaxu ministru nian atu haree konteúdu hosi despaxu.

‘’Despaxu ministru nian iha ne’eba hakerek katak iha pontu tolu ne’ebé partidu Fitun tenke prienxe fila-fali hanesan dokumentu ne’ebé mak tama liu-liu kartaun eleitorál nu’udar dokumentu komprovativu identidade apoiante partidu nian,  ne’ebé sira hatama ho númeru 20 mil itál, maibé hafoin ekipa diresaun  jerál servisu notariadu verifika la to’o 20 mil no iha de’it 18 mil tanba sira seluk ne’e dupla signifika ema ida nia kartaun eleitorál kopia dala rua ka tolu tanba ne’e la prienxe rekizitu,” Crisogno da Costa Neto hateten.

Crisogno da Costa Neto, dehan tan, ba dadaun iha faze diresaun  ne’e hala’o hela verifikasaun ba  partidu Patifor, Partidu Dezenvolvimentu Sosiál no Partidu Os Verdes durante loron-90 atu hatama relatóriu.

Tuir lei primeira alterasaun partidu polítiku númeru 2/2016 iha artigu 13  nu’udar rekizitu ba partidu foun tenke kumpre ba dokumentu válidu sira. Nune’e, iha faze verifikasaun rekizitu sira prienxe ona mak partidu foun sira sei halo inskrisaun legál.

Jornalista   : Nelson de Sousa

Editór        : Francisco Simões

 

 

HAKEREK NO HATÁN

Please enter your comment!
Please enter your name here