Primeiru-Ministru, Taur Matan Ruak prezide reuniaun Konsellu Ministru estraordinária, iha Palásiu Governu, sexta (08/01), Imajen Tatoli/Egas Cristovão

DILI, 08 janeiru 2021 (TATOLI)–Ezekutivu sira liuhosi reuniaun Konsellu Ministru (KM) estraórdinaria, aprova ona projetu dekretu Governu nian kona-ba ezekusaun Orsamentu Jerál Estadu (OJE) 2021.

“Projetu dekretu Governu ne’ebé aprezenta hosi Ministru Finansa, Rui Augusto Gomes aprovadu,” Ministru Prezidénsia Konsellu Ministru, Fidelis Manuel Leite Magalhães, informa ba jornalista sira hafoin reuniaun KM iha Palásiu Governu, sesta ne’e.

Notísia Relevante: Prezidente Repúblika promulga OJE 2021

Portavós Governu ne’e dehan, dekretu Governu ne’e hatuur regra sira kona-ba ezekusaun orsamentu tinan ne’e, ne’ebé hetan aprovasaun hosi Lei númeru 4/2020, loron 29 dezembru no aplika ba orsamentu sira iha órgaun no serbisu sira hosi Administrasaun Sentrál, Rejiaun Administrativa Espesiál Oé-cusse Ambeno inklui Seguransa Sosiál.

Diploma ne’e, hakarak fó garantia efetivu no rigorozu ba kontrolu orsamentál no iha tempu hanesan bele simplifika prosedimentu ezekusaun orsamentál, ne’ebé fó kontinuidade ba mudansa sira ne’ebé hahú ona iha tinan 2020.

“Ho objetivu atu fasilita ezekusaun Orsamentu Jerál Estadu tinan 2021 hosi órgaun no servisu Setór Públiku Administrativu nian,” Ministru akresenta.

Entre diferensa Dekretu Governu ba Ezekusaun OJE 2020, eziste de’it rejime finanseiru rua, inklui implementasaun hosi orsamentasaun liuhosi programa sira, halo alterasaun ba data taka ezersísiu orsamentál, aumenta fleksibilizasaun hosi ezekusaun orsamentál no aumentu obrigasaun hodi informasaun kona-ba ezekusaun.

Iha loron 28 dezembru 2020, Prezidente Repúblika promulga ona Orsamentu Jerál Estadu (OJE) 2021, ho montante biliaun $1,895, ne’ebé husi montante ne’e biliaun $1,377 husi fundu petrolíferu no reseita naun petrolíferu millaun $508.

OJE 2021 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here