Administradór Munisípiu Lautém, Domingos Sávio. Imajen/Espesiál.

DILI, 11 janeiru 2021 (TATOLI)—Ministru Adminsitrasaun Estatál (MAE), Miguel Pereira de Carvalho, hateten Governu hakarak fó konfiansa ba administradór foun atu asume knaar hanesan reprezentante Governu lokál iha Munisípiu Lautém.

Notísia Relevante: Polítika VIII Governu hakarak hadi’a funsionamentu Administrasaun Lokál Estadu nian

“Jestu ne’ebé ita foin asiste iha serimónia ida-ne’e, hakarak hatudu katak liuhosi aktu ofisiál ida-ne’e, Governu hakarak hafoun fali ninia konfiansa ba Administradór foun hodi asume kargu nu’udar Governu nia reprezentante Governu lokál iha Munisípiu Lautém,” Migeul Pereira de Carvalho Miguel Perreira de Carvalho hateten liuhosi ninia diskursu iha serimónia tomada de pose ba Administradór Munisipiu Lautém iha Lautém ne’ebe Agencia TATOLI asesu, segunda ne’e. 

Aktu ofisiál ida-ne’e, nia hatutan, hakarak ekspresa hanoin ida katak servisu ne’ebé administradór foun Lautém nian atu hala’o ba oin ne’e, la’os buat kmaan ida maibé servisu ida foin simu ne’e ejijente no todan tebes, tanba ejize administradór atu esforsu ho badinas bele servi ba ema hotu.

“Sei hasoru momentu barak ne’ebé ejize ita-nia sakrifísiu. Ita dala barak tenke hakraik-aan hodi bele sai nu’udar instrumentu Estadu nian ida-ne’ebé halibur sidadaun sira hotu, hodi hala’o Planu Dezenvolvimentu Nasionál. Nu’udar Administradór Munisipál, ita prontu ona atu kaer responsabilidade no hasoru dezafiu sira ne’ebé atu mosu,” nia dehan.

Tanba ne’e, nia bolu atensaun ba Administradór foun Munisípiu Lautém nian katak programa munisípiu labele haketak-aan hosi programa nasionál, ne’ebé trasa ona iha PEDN no programa sira iha nivel lokál tenke han malu ho programa nasionál, atu nue’e labele hamosu diskrepansia. 

Nia hateten, infelizmente implementasaun estratéjia dezentralizasaun administrativa nian iha hela faze dahuluk nian, faze deskonsentrasaun administrativa ne’ebé define Administrasaun Munisípiu no Autoridade Munisípiu hanesan servisu Administraasaun lokál Estadu ho funsaun hodi asegura realizasaun funsaun administrativa Estadu nian iha nível munisípiu no nível postu administrativu, maibé depende  ierarkia no organikamente ba membru Governu responsável ba Administrasaun Estatál.

Governante ne’e hateten, Administradór Munisípiu Lautém mak reprezentante Governu nian iha Munisípiu hodi dirije Administrasaun Munisípiu Lautém, asegura no normaliza funsionamentu servisu Administrasaun Lokál Estadu iha Munisípiu Lautém no responde atividade hotu perante membru Governu ne’ebé responsável ba Administrasaun Estatál.

“Hanesan reprezentante Governu iha nivél Munisípiu, Administradór Munisípiu Lautém dirije no ezerse kompeténsia sira ne’ebé Governu deskonsentra ona ba iha Munisípiu sira, nomeadamente kompeténsia iha domíniu Edukasaun, Saúde, Seguransa Alimentar, Obras Públika, Transporte, Agua, Saneamentu no Ambiente, Seguransa Alimentar, Agrikultura, jestaun Merkadu no Turizmu, Asaun Sosiál, jestaun dezastre Naturais, Protesaun sivíl,  Rejistu Notariadou,  servisu kadastrais no apoiu ba organizasaun naun governamental no organizasaun komunitária sira,” nia dehan. 

Hodi ezerse kompeténsia hirak ne’e, nia dehan, munisípiu sira utiliza instrumentu jestaun sira hanesan Planu Dezenvolvimentu Munisípiu, Planu Asaun Anual, Planu Investimentu Munisípiu, Planu Aprovizionamentu Munisípiu, Planu Munisípiu Formasaun Anual Rekursu Umanos, no Orsamentu Munisípiu ne’ebé aprova husi Parlamentu Nasionál.

Tan ne’e, nia afirma, ho Administradór Lautém ne’ebé foin simu pose iha tarefa boot tebes no iha dezafiu barak iha oin hodi assegura katak servisu administrasaun públika nian ne’ebé deskonsentra ona ba Munisípiu sira bele implementa ho didi’ak hodi garante katak objetivu hosi dezentralizasaun administrativa ne’ebé temi iha Planu Estratéjiu dezenvolvimentu Nasionál 2011-2030 nian bele atinji ho di’ak.

Nomeadamente, nia hateten, bele garante dezenvolvimentu setór privadu iha área rurál, kria oportunidade foun ba partisipasaun demokrátia iha nível lokál, promosaun instituisaun Estadu sira ne’ebé forte no estabelesimentu prestasaun mais efetiva, efisiente no ekitativa hosi servisu públiku sira.

Ho apoiu hosi servisu sentrál  sira, tuir nia, Administradór Munisípiu Lautém sei halo esforsu hotu hodi garante katak estudante sira iha eskola pré-primária no primaria iha Lautém, iha kondisaun mínimu hodi nune’e estudante sira bele tuir prosesu aprendizajen ho di’ak.

Nia dehan, populasaun sira iha Munisípiu Lautém tenke hetan atendimentu saúde di’ak iha Postu Saúde no Sentru Saúde Komunitáriu sira,  infraestrutura rurál no urbana ne’ebé adekuadu hodi fasilita vida moris populasaun nian.

Nia hatutan, kanalizasaun bee-moos ba komunidade nia uma no saneamentu adekuadu, apoia no koordena atividade ekstensaun agríkola, vasinasaun animál, no apoia inisiativa reflorestasaun, hadi’a funsionamentu merkadu munisípiu sira.

“Faktu ida-ne’e halo okupante kargu Administradór Munisípiu no Prezidente Autoridade Munisípiu sira iha territóriu Timor-Leste ezerse sira-nia funsaun iha forma substituisaun durante tinan ida ka rua nia rohan,” nia esplika.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here