Ministru Administrasaun Estatál (MAE), Miguel Pereira de Carvalho. Imajen/TATOLI

DILI, 11 janeiru 2021 (TATOLI)—Ministru Administrasaun Estatál (MAE), Miguel Pereira de Carvalho, hateten polítika VIII Governu Konstituisionál nian mak hakarak hadi’a funsionamentu Administrasaun Lokál Estadu nian inklui garante kumprimentu ba enkuadramentu legál no ezistente sira-ne’ebé kona-ba regulamenta funsionamentu Administrasaun Lokál Estadu nian.

“Polítika VIII Governu Konstituisionál hakarak hadi’a funsionamentu Administrasaun Lokál Estadu nian iha Territóriu Timor-Leste,” Miguel Pereira de Carvalho hateten liuhosi ninia diskursu iha serimónia tomada de pose ba Administradór Munisipiu Lautém iha Lautém ne’ebe Agencia Tatoli asesu, segunda ne’e.

Miguel Perreira hateten, ho funsionamentu ne’e mak Governu halo selesaun ba kargu Administradór no Prezidente Autoridade Munisípiu hodi hala’o knaar iha munisipál ne’ebé sai hanesan reprezentante ba Governu lokál.

“Tan ne’e, Governu, iha tinan kotuk inisia selesaun pur méritu ba kargu Administradór no Prezidente Autoridade Munisípiu sira hodi konkretiza mandatu legál ne’ebé ohin ha’u temina ona, no ohin loron ita to’o ona iha faze ida hodi fó pose ba Administradór Munisípiu foun Lautém nian,” nia dehan.

Nia dehan, Konstituisaun Repúblika Demokrátika Timor-Leste (KRDTL) determina katak Estadu respeita iha nia Organizasaun Territoriál, prinsípiu deszentralizasaun administrasaun públika, no lei fundamentál Repúblika ne’e mós prevee ezisténsia poder lokál ne’ebé konstituidu hosi “Pesoa koletiva territóriu, dotada ho órgaun reprezentativu ho objetivu hodi organiza  partisipasaun sidadaun iha solusaun ba sira-nia problema rasik no promove dezenvolvimentu lokál, sein prejuízu partsipasaun Estadu nian.

Hodi konkretiza mandatu Konstituisionál ida-ne’e, nia dehan, Governu hala’o reforma administrasaun lokál Estadu hodi introdús estratéjia tranzisaun graduál servisu Administrasaun Munisípiu no Autoridade Munisípiu nian ba iha poder lokál, liuhosi faze fundamentú tolu.

“Faze dahuluk mak faze deskonsentrasaun administrativa. Faze daruak mak dezentralizasaun administrativa institusionál. Faze datoluk mak finalmente, faze dezentralizasaun administrativa territoriál, ne’ebé iha faze ida-ne’e Administrasaun Munisípiu no Autoridade Munisípiu sira sei tranzita ba Administrasaun Autónoma, dependente ba órgaun reprezentativu poder lokál sira,” nia haklaken.

Tanba ne’e, governante ne’e haktuir, aktu pose ne’ebé foin asiste ne’e hahú konkretiza dahuluk iha Timor-Leste ne’ebé mak kumprimentu ba artigu 152 hosi Dekretu Lei Nú. 3/2016 ho nia alterasaun sira-ne’ebé aprova Estatutu Administrasaun Munisipál, Autoridade Munisipál no Grupu Traballu Tékniku Interministeriál ba Dezentralizasaun Administrativa.

Nia informa, bainhira dekretu-lei Nú. 3/2016 hahú vigora iha loron 11 marsu 2016, la prejudika mandatu Administradór Munisípiu sira iha tempu ne’ebá hodi konklui sira-nia mandatu ne’ebé anteriormente nomea hosi Comissão Função Pública (CFP) to’o realiza selesaun pur méritu ba kargu Administradór Munisípiu no Prezidente Autoridade Munisípiu sira tuir dekretu-Governu Nú. 5/2016.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here