DILI, 11 janeiru 2021 (TATOLI) – Ministériu Públiku (MP) liuhosi prokuradór Pascásio de Roza Alves, ohin, iha nia alegasaun, hateten, desizaun eis-Ministru Koordenadór ba Asuntu Ekonómiku (MEKAE) no Ministru Agrikultura no Peska (MAP), Estanislau Aleixo da Silva, “ezonera” prezidente Ajénsia Espesializada ba Investimentu (AEI), Felisberto Araújo Duarte, tuir lei ka tuir prosesu legál.
Notísia Relevante : “Ezonera” prezidente AEI, eis ministru Estanislau hatán iha Tribunál
Ministru Estanislau, “ezonera’’ prezidente AEI, Felisberto Araújo Duarte, iha loron 30 juñu 2015. Tanba ne’e, rekerente la satisfeitu hodi kontrata nia advogadu Pedro Aparício Guterres, halo kontestasaun hasoru desizaun ne’e iha Tribunál.
Kontestasaun hosi parte rekerente meiu ida adekuadu atu halo opozisaun ba desizaun órgaun administrativu liuhosi rekursu kontensiozu judisiál ho nia finalidade atu husu apresiasaun judisiál ba desizaun administrativu. Tanba konsidera rekursu kontensiozu iha konflitu administrativu tanba desizaun viola lei nune’e ho petisaun hasoru rekeridu ka Estadu RDTL husu atu halo anulasaun.
Pascásio de Roza Alves ,hateten, elementu prova ne’ebé esensiál liu-liu ba prosesu ne’e mak prova dokumentál ho nune’e hafoin analiza la viola lei, signifika desizaun órgaun tutela ne’e legál.
“Dala ida tan ba kazu konkretu ida ne’e kondús hosi rekorrente ninian konstitui hanesan falta tau duni kauza ba kredibilidade Estadu”, deklara Prokuradór Pascásio de Roza Alves.
Nia dehan, ho komportamentu autór deskreve momoos iha despaxu ministru tutela aborda razaun no motivasaun sira ne’ebé determina ho instituisaun.
Pascásio de Roza afirma, desizaun administrasaun ne’e fundamentu no esklarese klaru faktu sira laiha kontradisaun no motivasaun ba desizaun destituisaun.
“Pozisaun ida ne’e hatudu ministériu públiku hato’o tiha ona iha kontestasaun no laiha nesesidade atu repete aproveita fila-fali razaun sira ne’ebé mak Estadu defende-aan iha kontestasaun,” Pascásio de Roza Alves esklarese.
MP nota parte rekerente defende hodi interpreta sala estatutu AIE nian no autór tau pozisaun AIE hanesan instituisaun privadu iha ne’ebé autór entende instituisaun ne’e labele hetan intervensaun tanba autonomia.
“Ikus liu hakarak atu dehan MP la hetan buat ruma ne’ebé kauza ba nulidade rekursu kontensiozu la oferese kondisaun prosede tanba mukit liu iha fundamentasaun,” Pascásio de Roza Alves hateten.
Ezonerasaun iha elementu tolu iha lei estatutu AEI hatete mandatu remata, rezigna-aan no liu hosi despaxu membru Governu tutela bainhira komete infrasaun.
Tuir entendimentu MP nian loloos Tribunál bele deside de’it desizaun liuhosi despaxu ne’ebé mak iha no la nesesáriu to’o iha audiénsia julgamentu. Maibé Tribunál entende buat seluk hodi dezigna ba julgamentu hodi halo inskrisaun ba testemuña ne’ebé aprezenta hosi autór rekerente no rekeridu.
Pedro Aparício Guterres, nu’udar advogadu ba eis-prezidente AEI, Felisberto Araújo Duarte, fundamenta katak, desizaun eis-ministru Estanislau nian ne’e viola lei la kumpre ba artigu 15 husi estatutu AEI, aprovadu no publikadu iha aneksu ba dekretu-Lei no. lei 34/2014 ho data 3 dezembru tipifika úniku razaun tolu hapara kargu prezidente, hanesan tuirmai; prazu mandatu hotu ona, a não ser hetan renovasaun, rezigna-aan, liuhosi despaxu membru Governu tutela bainhira halo falta grave ne’ebé komprovadu komete bainhira ezerse ninia funsaun sira.
Hafoin rona tiha alegasaun parte sira, Tribunál sei hasai notifikasaun desizaun finál ba prosesu sivíl ne’e iha tempu tuir mai.
Jornalista : Nelson de Sousa
Editór : Francisco Simões
