“Ezonera” prezidente AEI, eis ministru Estanislau hatán iha Tribunál
DILI, 27 outubru 2020 (TATOLI)- Eis Ministru Agrikultura no Peska (MAP), Estanislau da Conceição Aleixo Maria da Silva, ohin lokraik, tenke marka prezensa iha Tribunál Distritál Dili (TDD) hodi hatán ba desizaun ne’ebé nia foti iha 2015, “ezonera” prezidente Ajénsia Espesializada ba Investimentu (AEI), Felisberto Araújo Duarte.
Kontestasaun ba prosesu ne’e sivíl halo hosi parte rekerente ka vítima liuhosi nia advogadu privadu, Pedro Aparício Guterres, kontra eis Ministru Estanislau da Conceição Aleixo Maria da Silva, ne’ebé parte Ministériu Públiku (MP) reprezenta hosi Prokuradór Pascacio da Roza Alves.
Hosi parte rekerente ka vítima halo kontestasaun hasoru eis ministru MAP no mós eis ministru Koordenadór ba Asuntu Ekonómiku (MECAE) ne’ebé iha loron 30 juñu 2015 hasai desizaun hodi “ezonera” prezidente AEI.
Ajénsia AIE nu’udar instituisaun Estadu ne’ebé haree mós ba asuntu investimentu ne’ebé tutela direita ba iha MECAE iha Governasaun liubá.
Pedro Aparício hateten, desizaun ne’e ladún justu, tanba prosesu administrativu laiha jestasaun ida ba nia kliente hodi sai razaun atu ministru Estanislau tempu ne’ebá “ezonera” nia.
“Ami la aseita ho desizaun ministru nian lori mai Tribunál atu bele haree katak ninia desizaun hasai prezidente AEI tuir lei bele ka la’e,” Advogadu privadu, Pedro Aparício Guterres, lia tun ba jornalista iha TDD hafoin audiénsia julgamentu.
Nia hateten, parte rekerente la aseita ho desizaun ne’e tanba konsidera desizaun polítika la’ós haree ba legalidade, tanba lei ne’ebé mak aplika tuir estatutu Ajénsia ne’e nian iha artigu 15 iha buat tolu hateten ba jestór sira ne’ebé asume funsaun hanesan; dahuluk, prazu termina ona, daruak kuandu rezigna-an no ikus kuandu prezidente halo infrasaun ida ne’e boot.
Lei ne’e mós hateten, kuandu hasai liuhosi prosesu inkéritu hodi notifika hafoin nia iha direitu atu defende an.
Ba nomeasaun prezidente AEI mós fó kompeténsia membru Governu tutela ba ajénsia ne’e bele halo nomeasaun livre eskolla no lei ne’e iha baze fó kontratu tuir lei laborál.
“Ita-nia ministru halo desizaun ne’e la tuir lei tanba tuir nia hakarak,” Pedro Aparício hateten.
“Ami hatama prosesu ne’e ba Tribunál atu halo anulasaun ba desizaun ministru,” Pedro Aparício afirma tan.
Tuir kontratu ne’ebé antes ne’e iha eis prezidente AEI, Felisberto Araújo Duarte hetan nomeasaun hodi asume kargu ne’e durante tinan-lima, hosi 2015 to’o 2020, maibé foin hala’o kna’ar fulan-neen (6) eis Ministru Estanislau Aleixo da Silva hola desizaun hodi “ezonera” tiha.
Liu hosi audiénsia julgamentu primeira instánsia ne’e, Tribunál mós rona sasin na’in-tolu ho inisiál MCC, JM, PS nu’udar asesór no téknika advisor ba negósiu (bisnis) investimentu iha AEI iha tinan 2015.
Sasin sira konfesa ho integralmente ba Tribunál katak durante ne’ebá iha atividade servisu ho prezidente sesante buat hotu la’o di’ak no laiha komportamentu ne’ebé ladi’ak, tanba ne’e kona-ba desizaun polítika hodi hasai ne’e sira-nia parte laiha koñesimentu.
Hafoin rona tiha parte sira Juiza titular Francisca Cabral deside adia fila-fali julgamentu ba iha loron 20 novembru, tinan ne’e, iha tuku 9:00 Otl, hodi rona sasin sira seluk.
Jornalista : Nelson de Sousa
Editór : Francisco Simões
