Arguidu na’in-rua bá kazu internet ilegál hosi kompañia UNITECH submete ona ba iha julgamentu primeiru interrogatóriu iha TDD, sesta (08/01/2021). Imajen Tatoli/Nelson de Sousa

DILI, 08 janeiru  2021 (TATOLI)-Arguidu na’in-rua bá kazu internet ilegál hosi kompañia UNITECH ho inisiál MR no AMA,  ohin, submete ona ba iha julgamentu primeiru interrogatóriu iha Tribunál Distritál Dili (TDD).

Notísia Relevante : SIC deteta Lifetech mós fornese internet ilegál ba Telemor

Arguidu sira kumpre ona detensaun iha polísia durante oras 72  hodi lori ba iha Tribunál. Arguidu sira akompaña hosi membru Polísia Nasionál Servisu Investigasaun Kriminál  (PNSIK)    to’o iha  TDD iha tuku 10:57 Otl, ho  hatais roupa detidu  no aljema  (borgol) futu iha liman hodi tuir julgamentu primeiru interrogatóriu.

Prosesu julgamentu ne’e prezide hosi juis prosesu, Afonso Carmona no Ministériu Públiku (MP)  nu’udar na’in ba asaun titular penál reprezenta hosi prokuradór Matias Soares    no arguidu sira hetan asisténsia legál hosi advogadu privadu  Manuel Tilman.

Iha loron 04 janeiru 2021,   PNSIK ezekuta mandadu detensaun Tribunál Distritál Dili  (TDD) ho númeru NUC 0166/20/ PNSIK hodi halo buska no detensaun  hodi taka obrigatóriu atividade kompañia   UNITECH iha Bidau, Dili tanba deskonfia fornese internet illegal ba ministériu balun ne’ebé fó prezuiju ba Estadu Timor-Leste.

Durante buska PNSIK  rekolla evidénsia hanesan  Power Beam ne’ebé durante ne’e kompañia UNITECH utiliza hodi kapta liña internet  hosi nasaun  balun hodi fornese ba instituisaun sira.

Hafoin ne’e PNSIK dada fita police line  iha edifísiu kompañia UNITECH hodi asegura evidénsia balun  durante prosesu investigasaun.

Jornalista   : Nelson de Sousa

Editór         : Francisco Simões

HAKEREK NO HATÁN

Please enter your comment!
Please enter your name here