Logotipu Conselho de Imprensa (CI). Imajen/Espesiál.

DILI, 08 janeiru 2021 (TATOLI)—Parlamentu Nasionál (PN) sei realiza eleisaun ba membru Conselho de Imprensa (CI) iha loron 11 fulan-janeiru semana oin.

Notísia Relevante: Komisaun A konsidera jornalista na’in-32 ajuda deskobre prosesu eleisaun latuir lei

“Líder bankada parlamentár sira hotu-hotu konkorda atu realiza realiza plenária iha segunda-feira, 11 janeiru 2021 ho ajenda eleisaun ba membru Conselho de Imprensa tanba ajenda ne’e kleur demais ona. Tanba ne’e, meza prezidénsia husu bankada sira atu prepara sira-nia lista kandidatura,” Portavós atuál Sekretária Meza Parlamentu Nasionál, Deputada Lídia dos Santos Martins, informa liuhosi konferénsia imprensa, iha sala konferénsia Parlamentu Nasionál, sesta ne’e.

Desizaun ne’e foti liuhosi reuniaun bankada parlamentár ne’ebé hala’o iha loron 4 janeiru liubá.

Entretantu Bankada parlamentár Congresso Nacional de Reconstrução de Timorense (CNRT) propoin Expedito Loro Dias Ximenes, Bankada Frente Revolucionária de Timor-Leste Independente (FRETILIN) propoin Paulo Adriano da Cruz “Hunu Malu” (rejigna-aan ona), Bankada Partido Libertação Popular (PLP) propoin Jordão Antero Henrique Marques no Bankada UDT/FM propoin Deonaia da Silva Prego.

Tuir Lei Komunikasaun Sosiál artigu 45 kona-ba Kompozisaun Konsellu Imprensa alínea c, hateten sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili.

Bazea ba lei Komuniasaun Sosiál nú 5 /2014, 19 novembru, Kapítulu VII estabelse Konsellu Imprensa (CI-sigla portugés), artigu 42 (Natureza no Independénsia), alínea 1, hateten Konsellu Imprensa nu’udar entidade administrativu independente no hala’o ninia atribuisaun nomós kompeténsia la haktuir diretrís ka orientasaun sira podér polítiku nian.

Nune’e mós artigu 45 hosi Lei Komunikasaun kona-ba Kompozisaun Konsellu Imprensa hamutuk membru na’in-lima, ne’ebé atu hili liuhosi dalan tuir-mai:

a) Reprezentante jornalista na’in-rua ne’ebé sira hili tiha ona liuhosi eleisaun (hili ona);
b) Reprezentante órgaun komunikasaun sosiál ida, ne’ebé órgaun sira hili tiha ona liuhosi eleisaun (hili ona);
c) Sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili (seidauk).
d) Membru sira Konsellu Imprensa hili entre sira ninia Prezidente.

Artigu 47 hosi Lei Komunikasaun Sosiál (Estatutu membru sira-nian) alínea 1 hateten bainhira membru Konsellu Imprensa hala’o knaar sei tau-hamutuk ho ezersísiu atividade profisionál ne’ebé hanesan, sei la selu nein fó subsídiu osan no la iha karatér permanente.

Alínea 2 hosi artigu ne’e fundamenta, membru sira Konsellu Imprensa iha direitu ba seña prezensa tuir termu ne’ebé ninia estatutu sei estabelese karik.

Tuir Rejimentu Parlamentu Nasionál (RPN) artigu 69 (Votatasaun nia forma) alínea 1 hateten votasaun nia forma sira hanessan tuir mai ne’e:
a. Votasaun ordinária;
b. Votasaun nominal;
c. Votasaun liuhosi ekkrutíniu sekretu.
d. La permite votasaun ho aklamasaun.

Ho eleisaun ba Membru Konsellu Imprensa uza RPN artigu 72 (Votasaun liuhosi eskrutíniu sekretu) katak, votasaun liuhosi eskrutíniu sekretu só bele uza iha eleisaun ka iha deliberaasaun ne’ebé, konforme Rejimentu ka Estatutu Deputadu sira-nian, tenke halo tuir forma ne’e, ka wainhira plenáriu delibera, tuir rekerimentu hosi Deputadu na’in-10.

Purtantu RPN Artigu 73 (Empate iha votasaun) alínea1 hateten, karik votasaun fó rezultado empate, matéria ne’ebé sai nu’udar objetu ba votasaun sei diskute tan molok tau hikas ba votasaun foun.

Alínea 2 hosi artigu 73 ne’e esplika, empate iha votasaun daruak sei konsidera katak la aprova.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here