Prezidente Repúblika, Francisco Guterres Lú Olo. Imajen António Gonçalves

DILI, 28 dezembru 2020 (TATOLI)—Prezidente Repúblika, Francisco Guterres Lú Olo, promulga ona Dekretu Parlamentu Nasionál númeru 26/V  Orsamentu Jerál Estadu (OJE) ba tinan 2021, iha loron 28 fulan dezembru tinan 2020.

Komunikadu hosi prezidénsia repúblika hateten, Orsamentu Jerál Estadu ba tinan 2021 nian hamosu alterasaun metodolójika balun ne’ebé halo indikasaun kona-ba despeza sira tuir programa ida-idak nian, aleinde utiliza klasifikasaun orgánika ka entidade ne’ebé mak atu realiza despeza no klasifikasaun ekonómika ka tipu despeza ne’ebé mak atu realiza.

OJE hamosu previzaun orsamentál ba órgaun no serbisu sira iha seitór públiku administrativu, kompostu hosi Orsamentu Administrasaun Sentrál, hosi Orsamentu Rejiaun Administrativa Espesiál Oe-Kusse Ambenu (RAEOA) no hosi Orsamentu Seguransa Sosiál nian.

Durante tinan 2021, Governu hetan autorizasaun atu realiza transferénsia hosi Fundu Petrolíferu to’o montante millaun $1.377,6.

Parlamentu Nasionál aprova Dekretu númeru 26/V Orsamentu Jerál Estadu ba tinan 2021, ho votu a favór 44, laiha votu kontra no laiha abstensaun iha loron 12 fulan-dezembru 2020.

Jornalista: Cipriano Colo

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here