PNTL liuhosi ekipa Servisu Investigasaun Kriminál (SEIC) halo detensaun ba prezidente ANC, João Oliveira Freitas . Imajen Tatoli/António Gonçalves

DILI, 26 novembru 2020 (TATOLI)-Autoridade Polísia Nasional Timor-Leste (PNTL) liuhosi ekipa Servisu Investigasaun Kriminál (SIC) deteta tan kompañia Lifetech mós durante ne’e fornese hela rede internet ilegál ba Telemor.

Notísia Relevante : Deskonfia, prezidente ANC iha relasaun ho ligasaun internet ilegál

Ekipa SIC no IT Profisionál Timoroan ida deskobre asaun ilegál ne’e bainhira halo investigasaun ba Data Center Telemor nian iha Timor Plaza, Dili.

Hafoin deteta tiha ekipamentu Lifetech ne’ebé monta iha Dada Center Telemor nian, ekipa husu kedas informasaun balun ba suspeitu TVB nu’udar jestór prinsipál  Telemor  kona-ba ninia koñesimentu ba lisensa Lifetech nian, maibé nia parte nonook hodi informa katak, sira halo kontratu servisu. Nune’e, parte SIC hosu kontratu entre parte- rua (Telemor no Lifetech), maibé parte Telemor seidauk entrega.

Ho informasaun ne’e, SIC deskonfia no foti desizaun hodi tesi kotu kedas koneksaun fiu fibra ótika ne’ebé iha ligasaun ba malu hodi simu liña internet hosi Indonézia ne’ebé fornese hosi Kompañia Elite Computer hosi Atambua mai tore Telemor iha Postu Administrativu Balibo ba Data Center Telemor hodi fornese rede iha territóriu Timor-Leste no hosi Timor-Leste ba Atambua-Indonézia.

Lifetech, halo ligasaun servisu direita ho Telemor hodi fornese internet ho kapasidade 35MB no totál koneksaun rede internet ilegál ne’ebé tama hosi Indonézia mai Timor-Leste liuhosi Telemor hamutuk 1GB ne’ebé fó prejuizu ba Estadu Timor-Leste.

Iha parte seluk, Advogadu Kompañia Telemor, Pedro Aparício Guterres, deklara nia parte mós seidauk bele ko’alia, tanba sei akompaña nia kliente hodi kumpre prosesu investigasaun hosi SIC to’o prosesu julgamentu iha Tribunál Dili.

Bainhira SIC ezekuta mandadu buska, detensaun no apreensaun ba Prezidente ANC, João Oliveira Freitas mós deklara nia la iha koñesimentu kona-ba Kompañia Lifetech ne’ebé fornese hela rede internet ilegál ba Telemor.

“Kompañia Lifetech ne’e ha’u la iha koñesimentu,” Prezidente ANC João Oliveira Freitas hateten.

Tuir dadus ne’ebé Tatoli asesu, kompañia ualu (8) ne’ebé halo atividade legál no hatama pedidu lisensa koñesimentu ba Governu Timor-Leste liuhosi ANC mak hanesan, Kompañia Ace Consultancy, Lda, Cenime Network Satcom Timor, Lda, Gardamor ISP, Lda, Globalnet Unipesoal Lda, Metrolink Lda, Raph Vision Electronic Unipessoal Lda, Websatmedia Unipesoal Lda no W-Net Unipespal Lda.

SIC mós lori kedas atuál Prezidente ANC João Freitas ba ninia rezidénsia iha área Kampu Baru-Comoro, Dili, hodi foti dokumentu importante balun no halo apreensaun ba karreta privadu ida ho marka Terios kór mutin xapa matrikula, A.18405.

SIC sei kontinua halo investigasaun profunda nafatin, ba prezensa kompañia haat (4) ne’ebé la rejista iha ANC inklui Kompañia Lifetech no seluk tan ne’ebé halo koneksaun rede internet ilegál.

ANC (Autoridade Nacional das Telecomunicações)  harii tuir Dekretu -Lei nº 15/2012, de 28 de Marsu, nu’udar institutu públiku ne’ebé iha responsabilidade jurídiku no autonomia administrativa no finanseira ho misaun nu’udar reguladór ba setór telekomunikasaun iha Timor-Leste no buka moderniza servisu telekomunikasaun.

Jornalista      : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here