Estasionamentu jogu slot machine balun ne'ebé eziste iha Dili. Imajen TATOLI/Francisco Simões

DILI, 08 janeiru 2021 (TATOLI)–Inspesaun Jerál ba Jogu sira (IGJ, sigla portugés) hasai ona sirkulár ida ba operadór jogu slot machine atu kumpre regra saúde públika iha situasaun Estadu Emerjénsia (EE) no esforsu luta hasoru pandemia COVID-19.

“Iha regra Estadu Emerjénsia la hateten hapara atividade ekonómika, maibé ha’u hasai ona sirkulár ida no komunika ho operadór sira hodi kumpre regra saúde públika, katak iha estasionamentu jogu slot machine sira tenke prepara bee-moos, sabaun atu vizitante sira fase-liman, bainhira ema tama-sai fatin instalasaun tenke uza máskara, uza hand sanitizer no tenke halo teste temperatura ba vizitante sira,” Inspetór Jerál  Jogu, Domingos da Costa Guterres, informa ba Agência TATOLI iha ninia knaar fatin, Bebora, Dili, sesta ne’e.

Notísia Relevante: Tinan 2020, IGJ kontribui reseita millaun $1,4 ba kofre Estadu

Iha medida EE ba-dasiak nian, mensiona la bele halibur ema liu na’in-10 no tenke asegura distánsia fízika metru ida, tanba ne’e Responsável ne’e hateten IGJ destaka ona ninia pesoál iha estasionamentu jogu slot machine kada oras haat ema na’in-tolu no troka malu, hodi tau matan ba atividade iha fatin jogu, atu garante no asegura kumpre medida EE.

Inspetór Jerál Jogu, Domingos da Costa Guterres. Imajen TATOLI/Francisco Simões

“Ha’u hateten ba operadór sira, kuandu jogu rame liu sira tenke jere ema, balun lakon sai kedas no balun tama fali atu mantein distánsia sosiál no distánsia fízika, bainhira mákina jogu maka rabat-malu tenke jere atu garante distánsia fízika. Ami-nia pesoál sira haree no tau matan,” nia tenik.

Bá futuru, Domingos hateten, nia parte sei koordena ho Ministériu  Saúde  (MS) atu estasionamentu sira ne’ebé halibur ema barak tenke iha postu saúde atu observa ema-nia saúde.

Atividade jogu sira-ne’e la’o ho lisensa hosi Governu, ho baze Dekretu-Lei númeru 6/2016, 20 abríl, kona-ba rejime jurídiku bá lisensiamentu esplorasaun no kontrolu ba atividade jogu sosiál ho diversaun (lotaria populár), mákina ba jogu  (slot machine) ho jogu tradisionál iha Timor-Leste.

 Jornalista: Francisco Simões

Editora: Julia Chatarina

HAKEREK NO HATÁN

Please enter your comment!
Please enter your name here