Jogadór Nataniel Reis, momentu Kapitaun ekipa Boavista FC Timor. Imajen/Espesiál

DILI, 07 janeiru 2021 (TATOLI) – Eis Kapitaun klube Boavista FC Timor, Nataniel Reis deklara, nia muda ba Lalenok United FC  tanba Boavista mak hasai ona nia.

Notísia Relevante : Nataniel-Osvaldo sei reforsa Lalenok United FC

“Ha’u la’ós hakarak sai hosi Boavista, maibé Boavista mak hasai ha’u. Ha’u rona dehan sira hasai ona ha’u, maka prezidente Lalenok kontaktu ha’u hodi bá reforsa  Lalenok, ha’u mós simu,” dehan Nataniel ba Agência Tatoli iha Estádiu Munisipál Dili, kinta ne’e

Nia dehan, razaun hosi Boavista hasai nian ne’e la hatene oinsá loos, maibé hanesan jogadór nunka tau ba kestaun tanba futeból tenke lao nune’e.

“Ha’u la tau kestaun bá Boavista hasai ha’u ne’e, maibé iha futeból nune’e ita jogadór joga ema haree la di’ak sira bele hasai ita, maibé ha’u nafatin haka’as aan hodi hatudu jogu di’ak iha Lalenok,” Nataniel Reis hateten.

Kontratu ne’ebé Lalenok oferese bá eis jogadór Boavista ne’e durante tinan ida no nia rasik la fó sai kada fulan simu saláriu hira tanba konfidensiál.

“Ha’u sente kontente tebes tanba klube jigante ne’ebé sai kampiaun dala rua tuituir malu iha tasa 12 Novembru, dala ida iha Liga Futeból Amadora no kopa FFTL, iha Lalenok ha’u sei hatudu prestasaun ne’ebé di’ak hodi kontribui ba vitoria Lalenok nian hodi mantein Lalenok nia títulu,” nia relata.

Iha fatin hanesan treinadór Boavista, Miro Baldo Bento dehan, Boavista seidauk hasai jogadór ida, maibé iha époka ida jogadór nia kontratu remata fó fleksibilidade ba jogadór atu deside mantein ka buka fali klube seluk.

“Ami Boavista ne’e, bainhira kontratu ida ne’e remata ona konforme jogadór halo negosiasaun ho ami mak sira la tuir ami loke odamatan para sira buka fali klube seluk, ami la hanesan klube seluk hodi kesi metin jogadór. Boavista nunka hasai jogadór bainhira jogadór kontratu hotu hakarak sai ami la impede, kona-ba Nataniel Boavista la hasai nia,”  afirma Miro Baldo Bento.

Esperiénsia Nataniel

Nataniel hanesan jogadór antigu iha Boavista, bainhira Boavista sei uza naran Carsae FC.

“Ha’u ne’e hamutuk ho Boavista uluk kedan bainhira Boaviosta sei naran Carsae FC komesa iha tinan 2015-2017 mak troka ba Boavista, ha’u nafatin ho sira hosi 2018-2020 no agora 2021 ha’u muda ba Lalenok,” nia esplika.

Nataniel hanesan mós jogadór selesaun nasionál. Bainhira tama ba selesaun nasionál Nataniel hahú uluk nia karreira hanesan jogadór sentru juveníl iha 2006 iha U-12, 2009 komesa hamutuk iha U-16 no 2013 nia muda ona ba U-19.

Hosi esperiénsia ne’ebé iha jogadór ne’e hetan fiar hosi Federasaun Futeból Timor – Leste (FFTL) liuhosi treinadór Japan Tsukitate no Asistente Eduardo Pereira iha 2014 hanesan jogadór senior U-23 selesaun nasionál.

Bainhira involve iha selesaun nasionál senior, Nataniel hamutuk ho nia kolega sira reprezenta Timor – Leste ba joga iha internasionál hanesan Sea Games dala-tolu tuituir malu, ASEAN Games dala-rua no Suzuki Cup dala-rua.

Jornalista       : Hortencio Sanchez

Editór             : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here