DILI, 04 janeiru 2021 (TATOLI) – Treinadór Lalenok United FC, Gaspar Amaral, informa jogadór na’in-rua; na’in-ida hosi klube Karketu, Osvaldo Belo no Nataniel Reis hosi Boavista, asina ona kontratu ho Lalenok.
Jogadór na’in-rua ne’e sei reforsa Lalenok United FC iha Liga Futeból Timor – Leste (LFTL), epoka ne’e.
Nia dehan, prezensa jogadór na’in-rua ne’e hodi troka jogadór estranjeiru na’in-rua; Fabio Christian Cotinho hosi Brazil no Alan hosi Xile, ne’ebé Lalenok United FC despede ona.
“Ami presiza troka Alan ne’ebé mak agora fila ona ba nia nasaun, hanesan mós Christian nia rasik mak husu atu ba ferias iha nia nasaun,” Gaspar hateten, ohin, ba jornalista iha edifísiu Sekretaria Estadu Juventude no Desportu (SEJD), Lecidere, Dili.
Nataniel nia pozisaun iha Boavista antes ne’e hanesan kapitaun uza númeru kamizola 8, ne’ebé joga iha liña médiu. Enkuantu, Osvaldo joga iha liña “gelandang” Karketu nian uza númeru kamizola 23.
Jornalista : Hortencio Sanchez
Editór : Francisco Simões
