Ministru Finansa, Rui Augusto Gomes. Imajen TATOLI/António Gonçalves

DILI, 05 janeiru 2021 (TATOLI)–Governu liuhosi Ministériu Finansa (MF) seidauk husu ba Banku Sentrál Timor-Leste (BCTL, sigla portugés) halo levantamentu fundu petrolíferu hodi sustenta mákina Estadu tanba saldo tezouru sei sufisiente.

Maski iha loron 28 dezembru 2020, Prezidente Repúblika promulga ona Orsamentu Jerál Estadu (OJE) 2021, ho montante biliaun $1,895, ne’ebé husi montante ne’e biliaun $1,377 husi fundu petrolíferu no reseita naun petrolíferu millaun $508.

Notísia Relevante: Prezidente Repúblika promulga OJE 2021

Ministru Finansa, Rui Augostu Gomes, hateten likidez ne’ebé iha sufisiente atu sustenta mákina Estadu.

“Ami seidauk husu ba BCTL atu halo levantamentu tanba ita-nia likidez sei iha, ne’ebé bainhira osan iha la presiza halo pedidu. Likidez daudaun ne’e iha millaun $325-resin, ha’u bele dehan ne’e to’o,” Ministru Rui relata hafoin ramata enkontru ho Primeiru-Ministru, Taur Matan Ruak, iha Palásiu Governu, tersa ne’e.

Governante ne’e dehan, MF sei monitoriza saldo ne’e loron-loron bainhira likidez ne’e tun ba millaun $200 maka sei halo pedidu levantamentu ba Banku Sentrál.

Husi totál reseita fundu minarai biliaun $1,377, millaun $547 foti bazeia Rendimentu Sustentável Estimadu (RSE) no transferénsia superiór liu RSE millaun $829.

OJE 2021 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

OJE 2021 integra programa hamutuk 141, sub-programa 431 no totál atividade hamutuk 1.837.

Enkuantu tuir Ministru Finansa, pedidu dahuluk OJE 2020 hamutuk millaun $936,3 no levantamentu fundu petrolíferu hamutuk millaun $886,3.

Parlamentu Nasionál aprova orsamentu tinan 2020 ho valór biliaun $1,497, ne’ebé saláriu no vensimentu millaun $207,3, bens no servisu millaun $563, transferénsia públika millaun $504,3, kapitál menór millaun $9,2 no kapitál dezenvolvimentu millaun $213, 4.

Husi janeiru to’o outubru ezekusaun liuhosi rejime duodesimál no ezekusaun normál foin akontese iha novembru to’o dezembru 2020.

“Agora falta millaun $500 mak ami seidauk husu para hamutuk millaun $936.300″, Rui subliña.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here