Ofisiail Funsionariu husi Ministeriu Solidaderidade kontinua atende no halao pagamentu subsidiu $200 ba komunidade sira. Imajen TATOLI/Antonio Goncalves

DILI, 05 janeiru 2021 (TATOLI)—Governu liuhosi Ministériu Solidaridade Sosiál no Inkluzaun (MSSI) no Ministériu Adminitrasaun Estatál (MAE), sei halo pagamentu subsídiu $200 faze daruak nian ba reklamante hamutuk uma-kain rihun 12.597.

Notísia Relevante: Governu halo ona pagamentu subsídiu $200 ba reklamante hamutuk 2.708

Vise-Ministra MSSI, Signi Chandrawati Verdiál, hateten pagamentu apoiu ba agregadu familiár partikularmente ba sira-ne’ebé tama iha lista reklamante ne’e, sei hala’o iha loron 8 fulan janeiru tinan 2021 ba munisípiu 12 la inklui ho RAEOA.

“Daudaun ne’e Governu aprova tiha ona millaun $2.519, 400.00 ba reklamante rihun 12.597. Tanba ne’e,  iha loron  8 fulan janeiru tinan 2021 agora, ita konta hela loron tolu tan, kada ema sei simu sira-nia osan dolar $200,” Signi Chandrawati Verdiál hateten liuhosi komunikadu imprensa ne’ebé hala’o iha Salaun MSSI Caicoli, Dili, tersa ne’e.

Nia hateten, osan ho montante millaun $ 2.519,400.00 ne’e inklui ba reklamante sira iha Rejiaun Administrativa Espesiál Oé-Cusse Ambeno (RAEOA) maibé tanba teritóriu RAEOA iha hela lockdown, nune’e pagamentu ba reklamante sira iha Oé-Cusse sei hein to’o lockdown ramata.

Governante ne’e esklarese, prosesu ba pagamentu, MSSI nia ekipa sei dezloka iha loron 7 fulan janeiru sei to’o iha suku ne’ebé rejistu reklamante tanba ne’e Governu husu nafatin ba lideransa komunitária, autoridade lokál ho PNTL atu apoiu ekipa nia servisu to’o ramata.

“Husu ba organizasaun sosiedade sivil, provedór direitu umanu no justisa ho Comissão Antí Corrupção (CAC) atu kontinua tau-matan ba programa pagamentu subsídiu $200 ne’e to’o ramata,” Signi hateten.

Membru Governu ne’e mós apela ba reklamante sira katak bainhira atu simu subsídiu tenke kumpre nafatin regra Estadu Emerjénsia (EE) nian.

“Ha’u hakarak husu ba populasaun tomak atu kontinua nafatin vijilansia totál, kumpre avizu sira ne’ebé ita-nia Ministériu Saúde fó sai ona katak fase liman, uza maskára, distánsiamentu sosiál,” nia apela.

 Iha fatin hanesan Diretór Nasionál Protokolu no Komunikasaun Sosiál-MAE (NDCS-MAE), Sebastião Pereira, esplika antes ne’e dadus ne’ebé iha reklamante hamutuk rihun 15 maibé hafoin halo verifikasaun dadus ne’e tun ba rihun 12.597.

“Antes dadus ne’ebé tama ba MSSI reklamante hamutuk rihun 15 maibé hafoin halo verifikasaun ba lista ne’ebé iha dadus ne’e tun ba rihun 12.597. Tanba, dadus sira-ne’e ami rekolla hotu tiha halo kombinasaun, ami haruka fali ba Suku to’o iha Suku halo verifikasaun tan. Tanba, lista anterior ne’e hetan naran duplikasaun no balu simu tiha ona naran mosu fali entaun hosi ida-ne’e halo redusaun to’o hetan mak 12.597. Entaun, dadus sira-ne’e hato’o fali mai Estatál mak haruka mai iha MSSI,” nia subliña.

Nia esklarese ba reklmante sira ne’ebé simu subsídiu $200 ba faze daruak nian laiha tan ona ba faze datoluk tanba dadus reklamante 12.597 maka ikus ona.

Entretantu Diretór Jerál Solidaridade Sosiál no Inkluzaun Ezersísiu, Florencio Dias Gonzaga, esklarese viatura ne’ebé utiliza ba prosesu pagamentu agora hamutuk 76, MSSI hetan apoiu hosi partimóniu Estadu hamutuk 51 no MSSI iha transporte rasik kada munisípiu transporte ida nune’e hamutuk 12 munisípiu  inklui RAEOA  transporte hamutuk 13.

“Agora ne’e ita la aluga tan karreta hosi kompañia tanba ita hetan tan apoiu  transporte balun hosi patrimóniu Estadu,  ne’ebé MSSI rasik atu kompleta transporte hotu-hotu  ne’ebé presiza. Ba prosesu pagamentu ita iha ona koordenasaun parte patrimónia estadu horisehik, kuaze metade karreta ne’ebé ita presiza sira update mai ona ho motirista kompletu. Agora finansa prepara ona sira-nia dokumentu balu ne’ebé relevante depois iha loron 6 janeiru, asuntu tekniku hotu-hotu ramata no iha loron 7 janeiru aranka ba munisípiu,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here