Ofisiail Funsionariu husi Ministeriu Solidaderidade kontinua halao pagamentu subsidiu $200 ba komunidade sira iha Sede Suku Bairo Pite,. Imajen/Antonio Goncalves

DILI, 16 dezembru 2020 (TATOLI)–Governu liuhosi ekipa Ministériu Solidaridade Sosiál no Inkluzaun (MSSI) hamutuk ekipa pagamentu MSSI munisipál finaliza ona pagamentu subsídiu $200 ba reklamante hamutuk 2.708 iha territóriu Timor-Leste.

“Pagamentu subsídiu $200 ba reklamante 2.708 ne’ebé mak ita finaliza ona iha semana kotuk iha territóriu Timor-Leste. Ita hein ekipa MSSI halo rekonsiliasaun ba dadus ne’ebé liga ho relatóriu kada munisípiu nian,” Rui Manuel Gago Exposto hatete Agência TATOLI iha nia servisu fatin, Caicoli, Dili, foin lalais ne’e. 

Rui Manuel Gago Exposto hateten, maske pagamentu finaliza ona maibé tuir informasaun katak iha benefisiáriu balun ne’ebé seidauk simu ne’e, Governu liuhosi Banku Nasionál Komérsiu Timor-Leste (BNCTL) entrega hotu ona osan ba konta suku nian ho durasaun semana ida-resin maibé tanbasá mak Xefe Suku la selu.

“Tanba ne’e, ita labele politiza sasán. Lista reklamante hamutuk 2.884 ne’e, ami haruka Xefe Suku atu taka sai iha sede suku sira, atu ema bele haree naran. MSSI fó lista benefisiáriu ne’ebé kompletu hodi haruka Xefe Suku sira taka sai semana rua antes, hafoin pagamentu mak hahú semana tuir mai,” nia dehan.

Se Xefe Suku sira lakohi taka sai naran lista benefisiáriu iha sede suku, nia dehan, ne’e la’ós Governu nia kulpa tanba durante prosesu pagamentu ema la ba simu osan ne’e la’ós Governu nia sala no bainhira to’o iha loron terminasaun, MSSI tenke retira osan no Xefe Suku sira tenke depozita fila-fali osan ba konta bankária.

“MSSI atualiza informasaun ikus ne’e iha de’it reklamante hamutuk 2.708 hosi reklamante 2.884 mak simu ona subsídiu $200 no restante ami depozita fila-fali. Restante la simu ne’e, ha’u la hatene, maibé ita-nia Xefe Suku sira mak bele esplika tanba lista reklamante maihosi suku maibé tanbasá la halo pagamentu,” nia dehan.

Maibé, nia hateten, Governu sei halo pagamentu daruak ba reklamante rihun 12-resin ne’ebé seidauk simu subsídiu $200, no naran sira-ne’e sei iha prosesu nia-laran maibé la hatene bainhira mak atu selu.

Notísia Relevante: Reklamante 1400 hosi Suku Comoro hato’o keixa ba PN

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here