iklan

NASIONÁL, JUSTISA, DILI, KAPITÁL, LEI, SEGURANSA

Durante simu tinan foun, Polísia Dili rejistu kazu 50

Durante simu tinan foun, Polísia Dili rejistu kazu 50

Polísia Nasionál Timor-Leste (PNTL) hosi Unidade Espesial Polísia (UEP) hala'o atraksaun bainhira komemora aniversariu ba dala-XI iha Kuartel UEP, Dili, 14 agostu 2020. Imajen Tatoli/Antonio Goncalves

DILI, 04 janeiru 2021 (TATOLI) – Durante simu tinan foun, hosi loron 31 dezembru 2020 to’o loron 01 janeiru 2021, Komandu Polísia Munisípiu Dili rejista kazu hamutuk 50 ne’ebé akontese iha area jurizdisaun Munisípiu Dili.

Notísia Relevante : PNTL Dili hatama $166,202 ba kofre Estadu

Komandante PNTL Munisípiu Dili, Superintendente Xefe, Henrique da Costa, informa dadus estatístika Komandu Dili númeru kazu ne’ebé rejista asidente akontese barak liu maka Eskuadra Don Aleixo nian.

Henrique da Costa hateten, tipu kazu sira ne’ebé PNTL rekolla maioria joven balun hemu tua lanu la kontrola aan hodi kria violénsia iha bairru balun, inklui lanu sa’e motór la uza kapasete no motór monu no soke.

“Ami rejista kazu insidente besik 50 ne’ebé maioria iha eskuadra Polísia Don Aleixo,” informa Komandante Polísia Dili, Superintendente Xefe, Henrique da Costa ba jornalista, ohin, iha Komandu PNTL, Dili.

Ekipa seguransa konjunta sira ne’e mós detein joven balun ho kondisaun lanu todan no kria problema iha estrada públiku. Polísia detein sira to’o sira-nia oin moos mak haruka sira fila ba sira ida-idak nia uma.

“Joven Balun lanu ita kaer lori mai tama sela, depois sira oin moos ita liberta fila fali sira no husu sira fila ba uma labele hemu lanu kria tan problema,” nia hateten.

Durante selebrasaun natál no tinan foun ne’e, PNTL Dili hetan apoiu servisu hosi Unidade Polisia Militár (PM) F-FDTL, Batallaun Orden Públiku (BOP), Unidade Espesiál Polísia (UEP), Unidade Polísia Marítima (UPM), Unidade Patrullamentu  Fronteira (UPF), Polísia Akademia Comoro, Servisu Informasaun Polísia (SIP), Ofisiál Polísia Suku (OPS), Departamentu Nasionál Tránzitu Seguransa Rodoviáriu (DNTSR), Konsellu Polisiamentu Komunitáriu (KPK) no autoridade suku hodi garante nafatin seguransa iha Dili laran.

 Jornalista  : Eugénio Pereira

Editór        : Francisco Simões

iklan
iklan

Leave a Reply

iklan
error: Content is protected !!