Komunidade Comoro halibur iha loja hodi troka voucher ho produtu Cesta Bázika, segunda (04/01). Imajen TATOLI/António Gonçalves

DILI, 04 janeiru 2021 (TATOLI)–Relasiona ho distribuisaun Cesta Bázika ne’ebé kontinua la’o iha ámbitu Estadu Emerjénsia (EE) da-siak ho medida rigór, Xefe Suku Fatuhada, Marcelino Soares, konsidera Governu hasai regra maibé iha sorin seluk nafatin implementa programa ne’ebé ema bele viola regra ne’e rasik.

“Governu hatene katak dekreta ona Estadu Emerjénsia, depois iha dekretu ne’e mensiona distansiamentu sosiál, fase liman bebeik no labele la’o arbiru, entaun sira tenke aplika tuir. Buat ne’e la’ós povu maka la kumpre maibé sira mak la kumpre. Distánsia ne’e se dekreta ona entaun labele haruka simu Cesta Bázika atu ema labele hadau malu,” Xefe Suku Fatuhada dehan iha Loja Meimart, Fatuhada, segunda ne’e.

Notísia Relevante: EE da-siak: viola medida ezekusaun sei asume responsabilidade kriminál

Nia konsidera, ba kestaun ne’e komunidade sira halo tuir de’it programa ne’ebé Governu implementa ona.

“Komunidade la sala, Governu maka sala tanba bainhira implementa ona regra tenke aplika hanesan distánsia sosiál, kestaun ne’e Polísia tenke tau matan,” nia akresenta.

Tuir nia, iha situasaun COVID-19 iha rai-laran ne’ebé aumenta ba bebeik, Governu presiza buka mekanizmu hodi evita ema halibur iha fatin ida.

“Ita hanesan kari batar hodi manu hadau malu, di’ak liu haruka ema hela hakmatek iha uma no Xefe Aldeia maka mobiliza, maibé kuandu avizu ona iha televizaun ne’e ita satán labele,” Líder suku ne’e lamenta.

Iha sorin seluk, Xefe Suku Comoro, Eurico da Costa, nota katak maski Governu fó sai ona medida EE ne’ebé rigór, maibé komunidade lakohi lakon ninia direitu no programa Governu ba rekuperasaun ekonómika ne’e tenke kontinua la’o.

“Distribuisaun Cesta Bázika iha Comoro la’o iha loron 35 nia laran de’it, agora iha loron-20  foin aldeia lima maka simu no falta aldeia sia tan,” nia akresenta.

Nune’e mós, Komunidade Aldeia Moris Foun, suku Comoro, Afonso Amaral, hateten regra ne’ebé Governu fó sai tenke kumpre, maibé presiza haree iha parte balun.

“Hau la konkorda nu’udar sarani, Governu haruka igreja la halo misa iha loron boot maibé autoriza nafatin realiza Cesta Bázika. Nu’udar sarani ha’u la simu, kuandu sistema ne’e la’o hotu labele suspende igreja,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here