Primeiru-Ministru interinu no atuál Vise Primeiru-Ministru no Ministru Planu no Ordenamentu, José Maria dos Reis, prezide reuniaun Konsellu Ministru, iha Palásiu Governu. Imajen TATOLI/Egas Cristóvão

DILI, 30 dezembru 2020 (TATOLI)–Governu liuhosi reuniaun Konsellu Ministru (KM) halo ona aprovasaun ba projetu dekretu Governu, ne’ebé aprezenta husi Primeiru-Ministru interinu, José Maria dos Reis, kona-ba medida ezekusaun Estadu Emerjénsia (EE) renovadu husi dekretu Prezidente Repúblika númeru 73/2020, loron 30 dezembru, atu hatán ba pandemia COVID-19.

EE iha faze da-siak ne’e sei abranje iha territóriu nasionál tomak no hahú vigora husi tuku 00:00 loron 03 janeiru 2021 to’o tuku 23:59 loron 01 fevereiru 2021.

Ministru Prezidénsia Konsellu Ministru, Fidelis Manuel Leite Magalhães, hateten bazeia ba desizaun no aprovasaun Parlamentu Nasionál (PN) ba deklarasaun EE da-siak, maka tenke implementa medida forte liután kompara ho medida hirak liubá, iha faze ne’e sei aplika kuaze hanesan ho medida EE dahuluk, haree ba kazu konfirmadu COVID-19 ne’ebé aumenta ba na’in-13 iha dezembru nia laran.

“Ajente servisu seguransa tenke sensibiliza ema hotu atubele kumpre saida maka hatúr iha dekretu Governu no bainhira identifika ema la halo tuir regra ne’ebé fó sai no hato’o keixa ruma ba Ministériu Públiku kona-ba saida maka akontese, no ema sira-ne’ebé viola, sei asume responsabilidade kriminál tuir saida mak mensiona iha Kódigu Penál artigu 244 kona-ba krime dezobediénsia,” Ministru Fidelis relata hafoin ramata reuniaun ezekutivu iha Palásiu Governu, kuarta ne’e.

Notísia Relevante: Prezidente Repúblika deklara estensaun EE ba-dasiak

Iha artigu 244, númeru 1 hateten, ema ne’ebé la halo tuir nafatin orden ka mandatu lejítimu komunikadu regularmente husi autoridade ka funsionáriu kompetente, sei hetan pena prizaun to’o tinan 3 ka multa no kuandu entidade ne’e dispozisaun legál determinada ka kuandu ne’e fó hatene ba ajente katak nia la halo tuir orden ka mandadu ne’e karik, maka sei hetan responsabilidade kriminál.

Enkuantu, iha artigu hanesan iha númeru 2 hateten, iha situasaun ne’ebé iha dispozisaun legál kualifika faktu hanesan dezobidiensia kualifikada, sei aplika pena prizaun tinan 1 to’o 4.

Maski nune’e, Portavós Governu ne’e dehan, antes forsa seguransa sira atu foti desizaun ba hirak ne’ebé la obedese regra, maka dahuluk tenke aviza ba ema hirak ne’e no kuandu reziste ka lakohi rona maka entidade sira aplika ba krime desobidiensia katak ema ne’e desobedese orden ne’ebé mai hosi entidade sira iha implemenasaun EE no lori ema ne’e prosesa tuir lei.

Dekretu Governu ne’e rekomenda mós katak ema hotu ne’ebé la sujeita ba izolamentu obrigatóriu no la ezerse kualker atividade profisionál ka dispensadu husi devér atu marka prezensa iha serbisu-fatin, tenke hela iha uma no só bele sai husi uma bainhira presiza.

“Kona-ba regra distansiamentu sosiál iha fatin públiku, dekretu Governu ne’e obriga atu ema hotu ne’ebé la sujeita ba rejime izolamentu obrigatóriu, bainhira la’o ain iha fatin públiku tenke la’o mesak, uza máskara no mantein distánsia pelumenus metru ida husi ema la’o ain sira seluk no evita halibur malu,” Ministru akresenta.

Aleinde ne’e, ema hotu tenke mantein distánsia pelumenus metru ida bainhira hein hela oportunidade atu tama ba loja laran, fatin serbisu administrasaun públika no iha fatin atu hein transporte públiku tula pasajeiru.

Bandu halo eventu sosiál

Iha EE períodu ne’e, bandu atu hala’o sorumutuk ka manifestasaun, realiza eventu sosiál, kulturál ka desportivu ne’ebé implika ema halibur malu na’in-sanulu resin.

Maibé proibisaun ida-ne’e la aplika ba prátika desportiva ne’ebé la halibur ema barak.

Bandu mós atu realiza kualker eventu ho karakter relijiozu, liu-liu selebrasaun kultu hirak ne’ebé halibur ema na’in-sanulu ba leten.

Enkuantu, realizasaun funerál tenke adota medida hirak ne’ebé prevene transmisaun vírus COVID-19 no labele konvoka prezensa iha tempu hanesan ba ema na’in-sanulu ba leten.

Kona-ba transporte públiku ne’ebé tula pasajeiru, nafatin bele halo sirkulasaun maibé veíkulu hirak ne’e tenke fase loro-loron molok hala’o atividade no motorista, tripulasaun no pasajeiru sira tenke uza máskara taka ibun no inus, inklui evita kontaktu fíziku.

Iha merkadu, estabelesimentu komersiál, industriál no artezanál ka estabelsimentu prestasaun serbisu hotu bele funsiona nafatin, ho kondisaun bainhira tama iha estabelesimentu tenke uza máskara, fase liman no halo distánsia pelumenus metru ida husi ema seluk.

Responsável merkadu no estabelesimentu sira tenke kria kondisaun hirak ne’ebé presiza ba kumprimentu regra no sei la fó tama ema ne’ebé la kumpre regra medida ezekusaun EE.

Regra hirak ne’ebé temi liubá aplika mós ba instalasaun sira iha servisu públiku ne’ebé funsiona.

Ba vendedór ambulante sira tenke mantein distánsia pelumenus metru ida husi kliente ka vendedór seluk no tenke uza permanente máskara taka ibun no inus, no fase liman halo mós nafatin.

Ema hotu-hotu ne’ebé hakarak tama ka sai husi territóriu nasionál tenke sujeita ba kontrolu sanitáriu.

Mantein obrigatóriu sujeita ba kuarentena ho durasaun mínima loron-14 no halo teste COVID-19 ba sidadaun ne’ebé hakarak tama iha territóriu nasionál, ne’ebé hatudu sintoma vírus ka halo ona kontaktu ho ema ne’ebé infetadu.

Despeza relasiona ho kuarentena, sei sai responsabilidade individuál iha estabelesimentu saúde, uma ka sentru izolamentu privadu.

Kontinua bandu ema hakat fronteira atu hetan asesu ba merkadu reguladu no ninia sansaun sira mantein.

Ema estranjeiru ne’ebé hakarak tama iha territóriu nasionál liuhosi fronteira terrestre sei sujeita nafatin ba autorizasaun prévia.

Ministru Interiór liuhosi diploma ministeriál bele determina atu taka temporariamente postu fronteira sira ka hamenus oráriu ba atendimentu púbiku iha postu hirak ne’e.

Iha reuniaun KM ohin deside kansela serimónia hasa’e bandeira iha loron 04 janeiru 2021 no selebrasaun Natál no tinan foun iha administrasaun públika.

Prezidente Repúblika Francisco Guterres ‘Lú Olo’, iha 03 dezembru 2020, dekreta EE da-ualuk ba loron-30, hahú husi tuku 00.00 iha 04 dezembru 2020 no termina iha tuku 23.59 iha 02 janeiru 2021, iha territóriu nasionál tomak.

Maibé seidauk ramata EE da-ualuk, Xefe Estadu dekreta EE da-siak bazeia ba proposta Governu tanba konsidera aumentu númeru kazu konfirmadu COVID-19 no hodi fó biban ezekutivu sira implementa regra rigór liután.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here