Imajen/Media PR.

DILI, 31 dezembru 2020 (TATOLI)–Prezidente Repúblika (PR), Francisco Guterres Lú Olo, apela ba povu Timor-Leste (TL) tomak atu kontribui hodi mantein kumpre protokolu saúde nian ne’ebé fó sai ona hosi Governu ba prevensaun Corona Virus (COVID-19) labele da’et iha rai ne’e.

Notisia Relevante: Prezidente Repúblika konvida povu TL fó omenájen ba eroi-eroina sira

“Liuhosi mensájen ida-ne’e, Prezidente Repúblika apela ba ema ida-idak fase liman beibeik, uza máskara no hadook-aan malu metru ida, pelu menus. Ida-idak tenke hatene kuida-aan hodi bele mós tau matan ba família, belun, kolega, Povu no País tomak,” PR Lú Olo fó sai apelu ne’e liu hosi mensajen  komemorasaun loron Eroina no Eroi Nasionál Sira Nian no simu tinan foun, iha palásiu Prezidente Bairru-Pité, Dili, kinta ne’e.

Xefe Estadu ne’e hateten, ohin, tinan 2020 to’o ona rohan no sei tama tinan foun ho preokupasaun boot hanesan ema ida-idak ninia direitu ba vida no moris saudável hetan ameasa hosi inimigu ida-ne’ebé la bele haree mak pandemia COVID-19.

Aman nasaun ne’e hatutan, ameasa ne’e hahú hosi marsu 2020 to’o ohin loron no bainhira Timor-Leste hetan kazu pozitivu dahuluk, Órgaun Soberania tolu, Governu, Parlamentu Nasional no Prezidente Repúblika, hafoin ida-idak tetu kle’an deside hamutuk hatuur kedas estadu emerjénsia.

“Ita tuir hela estadu emerjénsia daualu, hahú 3 dezembru liubá no sei ramata iha 2 janeiru. Hosi 3 janeiru ita sei tama ba estadu emerjensia dasiak no remata iha 1 fevereiru. Enkuantu estadu emerjénsia la’o dadaun, Governu iha kbiit hodi foti medida foun, kmaan ka todan. Tanba Estadu foti kedas medida atu proteje ita-nia Povu mak ita konsege satan COVID-19 iha fatin determina ba kuarentena no izolamentu, ema ida la mate no moras ne’e la da’et ba komunidade. Ho objetivu proteje nafatin Povu, mak Governu foti medida foun, iha 29 dezembru liubá, iha ámbitu estadu emerjénsia, daualu,” Xefe estadu ne’e haktuir.

Hafoin Konsellu Ministrus foti medida foun sira ne’e, Prezidente Repúblika, kansela kedas programa boot rua iha Palásiu Prezidensial Nicolau dos Reis Lobato: Programa ida mak festa Natal ho funsionáriu no kolaboradór sira iha 29 dezembru. PR Lú Olo hatutan, programa boot ida seluk mak atu komemora ohin, iha Palásiu ne’e, Loron Eroina no Eroi sira-nian.

Ho desizaun rua ne’e, Prezidente Repúblika kumpre regra Governu hatuur atu prevene no kombate COVID-19, karik hada’et ba komunidade.

“Regra ida hosi Governu mak ita labele halibur ema liu sanulu iha fatin ida. Regra ida-ne’e la aplika ba família ho ema hirak ne’ebé hela hamutuk iha uma ida de’it biar liu sanulu,” aman nasaun ne’e fó hanoin.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here