Bispu Dioseze Baucau, Don Basílio do Nascimento, prezide misa kalan 31 dezembru 2020. Imajen/Espesiál

BAUCAU, 31 dezembru 2020 (TATOLI) –Sarani hotu hosi Dioseze Baucau, liuliu hirak ne’ebé horik iha Parókia Santu António nia mahan, tenke asiste misa kalan, tinan foun, 31 dezembru ne’e, liuhosi de’it transmisaun direta Rádiu Fini Lorosa’e (RFL).

Notísia Relevante : PN aprova estensaun Estadu Emerjénsia ba-dasiak

Sarani balun ne’ebé bá asiste direta misa kalan, 31 dezembru 2020, bá rei ilas Kosok Oan Jezús. Imajen/Espesiál

“Ha’u hatene sarani barak hirus tanba ita la bele selebra misa hamutuk hanesan tinan sira liubá, maibé ita tenke kumpre desizaun Governu nian hodi evita moras aat Coronavirus ka COVID-19,” Bispu Dioseze Baucau, Mgr. Basílio do Nascimento, hateten liuhosi misa entrada ne’ebé hala’o iha Igreja Katedrál Baucau.

Sarani balun  iha uma-kain balun ho de’it meziña  ki’ik, nahe hena meza ki’ik kabeer, hatuur krús fiksu Jezús prega iha krús, harii mós lilin ida sunu lakan-nabilan hodi akompaña selebrasaun liturjia misa kalan tinan foun nian ne’e hosi de’it rádiu.

Notísia  Relevante : Xefe Estadu apela ba povu tomak kumpre protokolu saúde

Prezidente Repúblika, Francisco Guterres “Lú Olo”, liuhosi dekretu prezidensiál nú 73/2020, dekreta estensaun Estadu Emerjénsia (EE) ba dasiak (9) ne’ebé hahú vigora hosi tuku 00.00 OTL, 03 janeiru to’o 23h59otl loron-01 fevereiru 2021.

Deklarasaun estadu emerjénsia iha territóriu laran tomak ne’e, Xefe Estadu halo bazeia ba proposta hosi Governu ne’ebé konsidera aumentu númeru kazu konfirmadu Covid-19, hamutuk 13, iha semana ikus fulan ne’e, hanesan kalamidade públika, situasaun sanitária iha Indonézia no dezenvolvimentu tipu foun SARS-CoV-2 iha nasaun seluk, inklui iha nasaun viziñu Australia no Singapura.

Ho estadu emerjénsia ne’e, sei suspende no limita parsialmente  ezersísiu direitu balu, hosi ema ka sidadaun sira hanesan iha sirkulasaun internasionál, direitu hala’o reuniaun ka halibur malu no selu-seluk tan.

Don Basílio do Nascimento, iha nia omilia iha misa tedeum  kalan tinan foun ne’e, hateten   biar Timor-oan no sarani hotu la selebra misa hanesan asembleia, maibé Timor-oan no sarani hotu  iha ona esperiénsia hanesan ne’e  iha misa páskua nian liubá.

“Biar ita la halibur malu, maibé ita fiar iha Jezús Kristu Nia Naran. Biar, ohin, ita la hamutuk, maibé ita husu Maromak Nia grasa ho bensaun bá tinan foun ne’ebé atu tama daudaun,”  Don Basílio hateten.

Nia lia tun tan, “baibain kuandu  tinan remata, ita hala’o evaluasaun kona-ba buat ne’ebé ita simu hanesan ema, hanesan sarani, hanesan Maromak Nia oan ba buat ne’ebé ita simu hosi Nai Maromak.”

Iha omilia, Don Basílio refere liubá orasaun hosi Salmo 90 kona-ba Santu Moises nia orasaun kuandu nia lori povu fila-fali bá Kanan.  Hanesan hakerek iha Sagrada Liturjia katak Moises lori povu sira la’o tinan-40 nia laran iha rai-fuik maran nia (Moises, red) halo orasaun lubuk ida kona-ba Maromak Nia marka iha nia moris.

Orasaun sira mak hanesan tuir mai ne’e;

“Nai ita sai bá ami nu’udar mahon bá jerasaun bá jerasaun, molok foho sira, rai-klaran no mundu moris, Ita-boot Maromak nanis, Ita-boot halo ema sai bá rai-rahun, Ita-boot halo ema dukur iha tempu ida ne’e nia laran, tempu ne’e sai hanesan duut ne’ebé moris iha duut nia laran. Ita-boot tau iha Ita-boot oin, ami nia sala hotu, sala hirak ne’ebé ami halo iha ema hotu nia oin no sala hotu ne’ebé ami halo subar.

 Ita-boot Nia hirus halo ami nia tinan moris no ami nia iis kotu, ami nia tinan moris bibiit mak tinan 70 no to’o tinan 80 ba hirak ne’ebé moris forte liu, tinan hirak ne’e hotu liu lalais de’it. Se mak hamta’uk, Ita-Nia hirus,  Nai to’o bainhira mak Ita sadi’a ami, Ita-boot Nia atan sira, hakonu ami ho ita boot nia grasa atu ami bele moris iha ksolok iha ami nia vida tomak.

Nai ami Nia Maromak hasuli mai ami Ita-boot Nia bensaun hotu, haraik susesu ba ami  iha buat hotu-hotu iha ami nia moris..!”

Komuñaun espirituál

Iha selebrasaun liturjia misa baibain nian, sagrada komuñaun mak importante no sai esénsia boot ba misa tuir sarani nia fiar no Santa Kreda nia hanorin, maibé bá misa   kalan-ne’e, sarani sira la bele simu komuñaun direta no simu de’it komuñaun espirituál.

Tuir orientasaun Don Basílio nian katak hafoin komuñaun espirituál hotu, sarani sira hamutuk ho amu selebrante  reza orasaun komuñaun espirituál nian.

Orasaun komuñaun espirituál  

“Ha’u nia Jezús, ha’u fiar Ita-boot horik duni iha Sakramentu Eukaristia. Ha’u hadomi Ita-boot liu sasán hotu, ha’u hakarak tebes Ita-boot hit-aan mai ha’u laran tanba agora ha’u labele simu Ita-boot iha Sakramentu Eukaristia, Hit-aan mai bá, Espiritualmente iha ha’u-fuan, hanesan Ita horik duni ona iha ha’u-laran. Halo sai ida de’it ho Ita no Ita keta hadook-aan hosi ha’u. Amen”

Misa kalan ne’e, asiste direita de’it hosi sarani nain-ualu no ajuda hosi akólitu na’in-10-resin no komisaun liturjia sira na’in-haat. Sarani sira ne’e  simu komuñaun direta no sira bá rei Ilas Kosok Oan Jezús Kristu ne’ebé Don Basilio do Nascimento, “tane” iha liman-laran.

Jornalista: Francisco Simões

Editór: Agapito dos Santos

HAKEREK NO HATÁN

Please enter your comment!
Please enter your name here