Ponte Noefefan iha Oe-Cusse. Imajen/ZEESM

DILI, 30 dezembru 2020 (TATOLI)—Iha reuniaun Konsellu Ministru (KM), ezekutivu sira deside bandu deslokasaun ema husi Rejiaun Administrativa Espesiál Oé-cusse Ambeno (RAEOA) bá munisípiu seluk ka munisípiu ba zona espesiál ne’e to’o 18 janeiru 2021.

Antes ne’e, iha reuniaun KM deside bandu deslokasaun husi RAEOA ba fatin seluk hahú 29 dezembru to’o 02 janeiru, maibé Governu deside estende tempu tanba haree ba kazu konfirmadu COVID-19 tolu maka deteta iha Oé-cusse no daudaun pasiente infetadu halo hela tratamentu intensivu iha sala izolamentu RAEOA.

Notísia Relevante: Governu deside taka postu fronteira terrestre iha RAEOA, bandu deslokasaun

Tuir Ministru Prezidénsia Konsellu Ministru, Fidelis Manuel Leite Magalhães, desizaun ne’ebé Governu halo liuhosi rezolusaun ne’e atu fó biban ba entidade relevante kontrola saúde públika populasaun RAEOA no impede transmisaun lokál COVID-19 iha territóriu nasionál.

“Ho projetu rezolusaun Governu ne’e, postu fronteira ne’ebé eziste iha RAEOA sei taka hotu no bandu dezslokasaun liuhosi rai-maran no tasi entre rejiaun ne’e no munisípiu sira seluk to’o tuku 23:59 loron 18 janeiru 2021,” Ministru Fidelis informa hafoin ramata reuniaun ezekutivu iha Palásiu Governu, kuarta  ne’e.

Enkuantu, durante períodu ne’e, la bandu transporte merkadoria sasán nesesidade bázika ba RAEOA no asegura kombustível sira, maibé sidadaun sira sujeita ba serka sanitáriu tanba mosu infesaun COVID-19.

Governante ne’e relata, hafoin EE da-siak ne’e ramata iha loron 03 fevereiru 2021, Governu sei haree hikas no kuandu infetadu na’in-tolu ne’ebé daudaun iha izolamentu iha RAEOA ne’e rekuperadu ona no laiha evidénsia transmisaun komunitária maka bele altera fali rezolusaun ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here