Primeiru-Ministru interinu no atuál Vise Primeiru-Ministru no Ministru Planu no Ordenamentu, José Maria dos Reis, prezide reuniaun Konsellu Ministru, iha Palásiu Governu. Imajen TATOLI/Egas Cristóvão

DILI, 29 dezembru 2020 (TATOLI)—Governu liuhosi reuniaun Konsellu Ministru (KM) deside taka provizóriu postu fronteira terrestre iha Rejiaun Administrativa Oé-cusse Ambeno (RAEOA) hodi kontrola transmisaun COVID-19 husi Timór Osidentál, Repúblika Indonézia no bandu deslokasaun husi rejiaun ne’e ba munisípiu seluk ka husi munisípiu seluk ba RAEOA.

Ba desizaun ne’e, Governu halo Rezolusaun ne’ebé impoin sanitária ida iha RAEOA hodi hatán ba kazu COVID-19, nune’e bele kontrola saúde públika populasaun no impede transmisaun lokál iha territóriu nasionál.

“Ho Rezolusaun Governu ne’e, taka postu fronteira sira ne’ebé iha RAEOA no bandu deslokasaun husi dalan terrestre no tasi entre rejiaun ba munisípiu seluk, hahú ohin (29/12) to’o tuku 23:59 loron 02 janeiru 2021,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun KM iha Palásiu Governu, tersa ne’e.

Notísia Relevante: COVID-19 iha TL aumenta ba ema na’in 13

Tanba ne’e, Portavós Governu apela atu komunidade sira iha rejiaun ne’e bele hakmatek iha fatin to’o loron ne’e ramata.

“Husu ba hirak ne’ebé iha RAEOA atu hela metin iha ne’ebá to’o loron 02 janeiru 2020, labele halo viajen bá munisípiu seluk ou Dili, desizaun ne’e Governu foti tanba númeru infetadu iha Oé-cusse mós aumenta, nune’e mós atu fasilita Ministériu Saúde kontrola di’ak liután moras ne’e hodi labele hada’et ba mai ho lalais,” nia fó hanoin.

Antes ne’e, iha loron segunda (29/12), Ministériu Saúde liuhosi forsa tarefa prevensaun COVID-19, deteta tan kazu konfirmadu haat, ne’ebé husi númeru ne’e na’in-tolu husi RAEOA no daudaun ne’e halo hela tratamentu intensivu iha fatin izolamentu iha Oé-cusse.

Ho nune’e, totál konfirmadu COVID-19 iha dezembru ne’e hamutuk 13, ne’ebé hanesan kazu importadu husi nasaun viziñu, Timór Osidentál.

Daudaun ne’e, totál ema iha konfinamentu obrigaróriu iha Oé-cusse hamutuk 56, husi totál 349 iha munisípiu hotu, auto-kuarentena laiha no pasa ona kuarentena loron-14 iha Oé-cusse hamutuk 329 husi 6.813 iha munisípiu hotu.

Nune’e, totál kazu konfirmadu hamutuk 44, rekuperadu 31 no na’in-haat sei halo tratamentu intensivu iha izolamentu (ida iha Dili no tolu iha Oé-cusse).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here