Arsebispu ba Arkidioseze Metropolitana Dili, Virgílio do Carmo da Silva, SDB. Imajen TATOLI/Egas Cristovão

DILI, 30 dezembru 2020 (TATOLI)–Pró-Prezidente Conferência Episcopál Timorense (CET) no Arsebispu Arkedioseze Metropolitana Díli, Don Virgílio do Carmo da Silva, SDB, konsidera Timor-Leste (TL) ninia forsa atu kombate COVID-19 mak prevensaun.

Notísia Relevante: CET deside sarani sira akompaña misa 31 dezembru liuhosi rádiu-televizaun

Tanba ne’e, Dom Virgílio husu timoroan hotu atu fó liman ba malu hodi husik todan hotu ne’ebé halo ona iha tinan tuan no hakat hamutuk ho esperansa hodi kombate COVID-19 iha tinan foun 2021.

“Iha tinan foun ne’e, husu ema hotu fó liman ba malu no husik todan ne’ebé iha ba tinan tuan. Tinan foun hakat ho esperansa ho vasina ne’ebé mak la’o bele fó esperansa ba Timor-Leste,” Don Virgílio do Carmo da Silva,SDB hateten liuhosi konferénsia Imprensa iha salaun Câmara Eclesiástica, Lecidere, Dili, kuarta ne’e. 

Arsebispu ne’e rekoñese katak atu kombate COVID-19, Timor-Leste iha fasilidade ne’ebé mínimu tebes maibé forsa ne’e iha prevensaun de’it, nune’e husu ba ema hotu atu kumpre nafatin protokolu saúde nian.

“Ita-nia forsa mak iha prevensaun de’it. Tanba ne’e, dezde marsu to’o agora ita hakaas-aan atu halo prevensaun. Iha situasaun ne’e nia-laran, ita lakon pasiénsia tanba ita hakarak selebra loron boot ne’ebé mak atu despede tinan tuan no simu tinan foun nian, maibé realidade ne’ebé mak iha, ita labele realiza. Nune’e, ita tenke koopera no kolabora hamutuk ba Timor-Leste nia di’ak,” Dom Virgílio subliña.

Bibi-atan ne’e mós enkoraza timoroan hotu atu funu dala ida tan kontra virus aat (COVID-19) ne’e liuhosi fó liman ba malu hodi hases tiha moras aat ne’e, ho nia dalan úniku mak prevensaun.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here