Arsebispu ba Arkidioseze Metropolitana Dili, Virgílio do Carmo da Silva, SDB. Imajen Tatoli/Egas Cristovão

DILI, 30 dezembru 2020 (TATOLI)—Conferência Episcopál Timorense (CET) deside no husu ba sarani Katólika iha Timor laran tomak atu akompaña de’it misa taka tinan tuan iha 31 dezembru 2020 no misa tinan foun nian iha 01 janeiru 2021, liuhosi rádiu no televizaun.

Notísia Relevante: Alterasaun medida EE, bandu halibur liu na’in-10 exetu pertense família

Pro Prezidente CET no Arsebispu ba Arquidiocese Metropolitana Dili, Dom Virgílio do Carmo da Silva, SDB, hateten desizaun ne’e foti relasiona ho situasaun COVID-19 ne’ebé espalla iha Timor-Leste.

“Ho ne’e, husu ba amu-lulik sira atu kumpre no divulga dekretu Papal kona-ba COVID-19 ninian. Tuir dekretu ne’e, amu bispu sira deside katak selebrasaun litúrjika hotu liuliu loron rua ne’e nia-laran, sei laiha partisipasaun hosi povu,” Don Virgílio do Carmo da Silva hateten liuhosi Konferénsia Imprensa iha salaun Câmara Eclesiástica, Lecidere, Dili, kuarta ne’e. 

Arsebispu ne’e hameno, iha selebrasaun festa Mãe de Jesus, sarani sira sei tuir misa espirituál de’it iha ida-idak nia uma liuhosi kanál televizaun ka meiu seluk iha mídia sosiál nian.

“Biar sarani sira la simu komuñaun eukarístika maibé halo kumuñiaun espirituál de’it. Tanba ne’e, fó hanoin ba sarani sira katak ita-nia selebrasaun ne’e sei iha transmisaun direta hosi mídia GMN TV. Misa 31 dezembru oras 20:00 kalan no 01 janeiru oras 08:00 dadeer,” Don Virgílio fó hanoin.

Amu bispu hateten, baibain misa kompleta ho kumuñaun eukarístika nian maibé haree ba situasaun pandemia COVID-19, tempu kalamidade públiku no mundiál nian, Uma Kreda konvida sarani sira atu partisipa hosi kumuñaun eukarístika espirituál.

Atu evita perigu kontazu ne’e, Dom Virgílio husu ba amu lulik sira atu tuir rigorozamente orientasaun no desizaun hosi papa no CET nian.

Arsebispu dehan, ba konventu no semináriu inklui komunidade relijiozu no relijioza sira bele halo selebrasaun ba de’it membru komunidade nian tanba orientasaun hirak ne’e vigora no sei hein orientasaun tuir mai iha loron 3 fulan janeiru 2021 tuir dekretu Governu ne’ebé fó sai ona.

Desizaun ne’e hatuur iha karta pastorál ne’ebé asina hosi Bispu Baucau no Sekretáriu Jerál CET Dom Basilio do Nascimento, Arsebispu Díli no Pró-Prezidente CET Dom Virgílio do Carmo da Silva,SDB, Bispu Maliana no Prezidente CET, Dom Norberto do Amaral.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here