Primeiru-Ministru interinu no atuál Vise Primeiru-Ministru no Ministru Planu no Ordenamentu, José Maria dos Reis, prezide reuniaun Konsellu Ministru, iha Palásiu Governu, tersa (29/12). Imajen TATOLI/Egas Cristóvão

DILI, 29 dezembru 2020 (TATOLI)—Governu liuhosi reuniaun Konsellu Ministru (KM) aprova projetu Dekretu Governu ne’ebé aprezenta husi Primeiru-Ministru ein ezersísiu, José Maria dos Reis, kona-ba alterasaun dahuluk Dekretu Governu númeru 18/2020, loron 03 dezembru, kona-ba medida ezekusaun Deklarasaun Estadu Emerjénsia (EE) ne’ebé efetua Dekretu Prezidente Repúblika númeru 70/2020, loron 03 dezembru. 

Hafoin Ministériu Saúde deklara kazu konfirmadu COVID-19 foun na’in-13 iha dezembru nia laran, Governu kontinua solisita Prezidente Repúblika dekreta EE atu kontinua halo vijilánsia saúde públika.

Iha alterasaun medida ezekusaun ne’e, bandu ema halibur barak iha fatin ruma.

“Labele halibur malu liu ema na’in sanulu, exetu sira ne’ebé pertense ba sira-nia agregadu familiár no labele organiza nein partisipa iha eventu ka selebrasaun sira ne’ebé envolve aglomerasaun liu ema na’in-sanulu, exetu sira pertense ba sira-nia agregadu familiár,” Ministru Prezidénsia Konsellu Ministru, Fidelis Manuel Leite Magalhães,” relata hafoin ramata reuniaun KM iha Palásiu Governu, tersa ne’e.

Notísia Relevante: Governu aprova medida ezekusaun EE daualuk

Tuir Portavós Governu, medida ne’e aplika hodi hatán ba situasaun sanitária iha provínsia Timór Osidentál, Repúblika Indonézia ne’ebé rejista ona ema 1.700 pozitivu COVID-19 no deskobre ona tipu foun SARS-CoV-2.

Aleinde ne’e, iha tan kazu foun iha territóriu nasionál, tanba ne’e Governu konsidera presiza aplika medida foun hodi evita transmisaun lokál.

Medida ne’e nafatin mantein define filafali regra distansiamentu sosiál obrigatóriu ba individuu hotu-hotu ne’ebé hela iha Timor-Leste.

“Mantein distánsia pelumenus metru ida husi ema ida ba ema seluk no bainhira sirkula la’o ain iha dalan públika ka tama iha resintu públiku ka privadu sira,” governante ne’e akresenta.

Nune’e mós, mantein uza máskara ne’ebé taka inus no ibun bainhira la’o iha dalan públika ka tama iha resintu públiku ka privadu no bainhira uza kualkér transporte públiku.

Mantein fase liman bainhira hakarak tama ka hela iha resintu públiku ka privadu.

“Alterasaun ba medida hirak ne’e válidu to’o loron 02 janeiru 2021, hafoin loron ne’e, aban (30/12) Governu bá Parlamentu Nasionál diskute pedidu estensaun Estadu Emerjénsia no hafoin aprova pedidu ne’e, lorokraik tuku 15:00 realiza hikas reuniaun Konsellu Ministru hodi aprova fali medida hirak ne’ebé sei implementa hosi loron 02 janeiru ba oin,” Ministru Fidelis esplika.

Prezidente Repúblika Francisco Guterres ‘Lú Olo’, iha 03 dezembru 2020, dekreta EE da-ualuk ba loron-30, hahú husi tuku 00.00 iha 04 dezembru 2020 no termina iha tuku 23.59 iha 02 janeiru 2021, iha territóriu nasionál tomak.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here