Ofsial Polísia Nasional Timor-Leste (PNTL) bainhira fó seguransa iha terrenu. Imajen Tatoli/Dok

DILI, 29 dezembru 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, afirma, PNTL prontu  garante nafatin implementasaun Estadu emerjénsia (EE) ba-dasiak ne’ebé tuir desizaun Estadu nian hodi bandu sidadaun halo festa no atividade lia adat sira.

Notísia Relevante : PR husu autorizasaun ba PN estende Estadu Emerjénsia

Estadu Timor-Leste, liu hosi reuniaun Konsellu Estadu deside ona hodi prolonga EE   ba da-sia ho ninia regra importante sira hanesan sidadaun sira tenke hotu-hotu obrigatóriu halo tuir medida ne’ebé tenke implementa hanesan, labele organiza eventu no halibur malu liuhosi ema na’in-10, sei la iha atividade eventu ka festa boot sira hosi loron 02 janeiru 2021 ba oin.

Komandante Jerál PNTL, Komisáriu Faustino da Costa. Imajen Tatoli/Eugénio Pereira

“Husu ba povu tomak, atu ita hotu- hotu nafatin koopera no implementa regra ne’ebé Ministériu Saúde no Organizasaun Mundiál Saúde (OMS) fó sai ba sidadaun sira atu kumpre regra sira ne’e, no mantein distánsia sosiál,” Komisáriu Faustino, ohin, hateten lihosi konferénsia imprensa iha Komandu Jerál PNTL, Dili.

PNTL sei halo kontrolu másimu movimentu sidadaun sira nian iha fronteira terrestre, Bobonaro, Covalima no Oe-cusse no área marítima nian hodi evita movimentu ilegál hodi prevene propagasaun surtu COVID-19.

Liuhosi reuniaun estraordináriu Konsellu Ministrus, ohin, aprova ona projetu dekretu Governu nian, ne’ebé aprezenta hosi Primeiru-Ministru ein ezersísiu, José Maria dos Reis, kona-ba alterasaun dahuluk ba Dekretu Governu n. 18/2020, hosi loron 3 fulan-dezembru, kona-ba medida sira ba ezekusaun Deklarasaun Estadu Emerjénsia ne’ebé efetua hosi Dekretu Prezidente Repúblika n. 70/2020, hosi loron 03 dezembru.

Hodi hatán ba agravamentu situasaun sanitária iha provínsia Timor Osidentál, iha Repúblika Indonézia nian, ne’ebé konta ona ema 1.700 hetan kazu pozitivu hosi COVID-19, no deskobre tipu foun SARS-CoV-2, ne’ebé sei iha tan kontajioza duke orijinál no mós tanba aumenta númeru kazu ne’ebé diagnóstika iha territóriu nasionál, presiza halo tuir medida foun sira hodi evita ba eziste surtu COVID-19 nian iha país. Ho alterasaun ida-ne’e, sei define filafali regra sira distansiamentu sosiál nian, ba indivíduu hotu-hotu ne’ebé hela iha Timor-Leste obrigatóriu:

  1. Mantein distánsia pelumenus metru ida ba ema seluk, katak la moris ho ekonomia komún (hela iha uma hanesan), bainhira sirkula la’o ain iha dalan públika ka tama iha resintu, públiku ka privadu sira, husi asesu públiku no utilizasaun koletiva
  2. Labele halibur malu ho ema na’in-sanulu, exetu sira pertense ba sira-nia agregadu família
  3. La organiza nein partisipa iha eventu ka selebrasaun sira ne’ebé envolve aglomerasaun liuhosi ema na’in-sanulu, exetu sira pertense ba sira-nia agregadu familiar
  4. Utiliza máskara ne’ebé taka inus no ibun bainhira la’o iha dalan públika ka tama ka hela iha resintu públiku ka privadu husi asesu públiku no utilizasaun koletiva no, bainhira uza kualkér transporte públiku ba pasajeiru sira
  5. Fase liman bainhira hakarak tama ka hela iha resintu públiku ka privadu sira husi asesu públiku no utilizasaun koletiva.

Aprova ona mós projetu Rezolusaun Governu nian, ne’ebé impoin serka sanitária ida iha Rejiaun Administrativa Espesiál Oekusi Ambenu (RAEOA) nian, hodi hatán ba kazu sira ne’ebé diagnóstika ho SARS-CoV-2 iha Rejiaun no atu kontrola saúde públika husi populasaun RAEOA nian no impede okorénsia transmisaun komunitáriu SARS-CoV-2 nian iha territóriu nasionál.

Ho projetu Rezolusaun Governu daudaun ne’e hodi taka postu fronteira sira ne’ebé iha RAEOA no bandu dezlokasaun sira, hosi dalan terrestre no hosi tasi nian, entre iha rejiaun ida-ne’e no iha munisípiu sira seluk, to’o tuku 23h59 hosi loron 02 janeiru 2021.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here