Prezidente Repúblika, Francisco Guterres Lú Olo, Prezide Reuniaun Konsellu Estadu iha Palásiu Prezidente Nicolau Lobato, Bairru Pite, Dili, segunda, (28/12). Imajen Tatoli /Egas Cristovão.

DILI, 29 dezembru 2020 (TATOLI) – Prezidente Repúblika, Francisco Guterres Lú Olo, ohin, sei hato’o pedidu autorizasaun husi Parlamentu Nasionál (PN) ba estensaun Estadu Emerjénsia (EE) ne’ebé oras ne’e vigora no sei termina iha tuku 23h59, 02 janeiru 2021.

Tuir komunikadu ne’ebé Agência TATOLI asesu haktuir, pedidu autorizasaun ba Parlamentu Nasionál ne’e, Xefe Estadu halo hafoin rona Konsellu Superiór Defeza no Seguransa no Konsellu Estadu nia opiniaun ne’ebé konkorda ho Governu nia pedidu ba Prezidente Repúblika atu estende Estadu Emerjénsia ba-dasiak hodi halo prevensaun ba COVID-19 no evita kalamidade públika.

Estadu emerjénsia durante loron-30, karik hetan aprovasaun hosi Parlamentu Nasionál, sei hahú hosi 03 janeiru no sei ramata iha 01 fevereiru 2021.

Hafoin reuniaun Konsellu Superiór Defeza no Seguransa no Konsellu Estadu, Asesór Polítiku Prezidente Repúblika, Gregorio de Sousa, informa medida prevensaun sira ne’ebé aplika iha EE, Ezekutivu mak sei kria diploma ba regra sira.

To’o oras ne’e, dezde marsu 2020, Timor-Leste rejista totál kazu 44, na’in-31 rekuperadu no kazu 13 sei ativu. Hosi kazu ativu kuaze akontese iha fulan-dezembru. To’o 28 dezembru tinan ne’e, Organizasaun Mundiál Saúde rejista ema liu millaun 81 mak afetadu ona hosi COVID-19 no liu millaun ida mak mate tanba moras ne’e.

Jornalista: Cipriano Colo

 Editór: Cancio Ximenes

HAKEREK NO HATÁN

Please enter your comment!
Please enter your name here