Primeiru-Ministru, Taur Matan Ruak, prezide reuniaun Konsellu Ministru estraordináriu, iha Palásiu Governu, kinta (03/12). Imajen TATOLI/Egas Cristovão

DILI, 03 dezembru 2020 (TATOLI)-Governu liuhosi sorumutuk Konsellu Ministru (KM) estraordináriu aprova projetu dekretu-lei Governu, ne’ebé aprezenta hosi Primeiru-Ministru (PM), Taur matan Ruak, kona-ba medida ezekusaun Estadu Emerjénsia (EE) daualuk, ne’ebé revona tuir dekretu Prezidente Repúblika númeru 70/2020, loron 03 dezembru hodi hatán ba pandemia COVID-19.

Ministru Prezidénsia Konsellu Ministru, Fidelis Manuel Leite Magalhães, relata EE faze ne’e sei abranje territóriu nasionál tomak no vigora hahú tuku 00:00 loron 04 dezembru 2020 to’o tuku 23:59 loron 02 janeiru 2021.

“Medida ezekusaun nafatin hanesan EE dahituk, katak sidadaun hotu iha territóriu nasionál evita partisipasaun ema lubun, mantein distánsia pelumenus metru ida ho balun entre ema, nafatin utiliza máskara ne’ebé taka ibun no fase liman beibeik bainhira iha asesu estabelesimentu komersiál sira ka edifísiu  públiku,” Ministru Fedelis relata hafoin ramata reuniaun KM iha Pálasiu Governu, kinta ne’e.

Notísia Relevante: PN aprova estensaun EE daualuk

Nune’e mós,  mantein obrigatóriu indivíduu hotu ne’ebé hakarak tama no sai hosi territóriu nasionál tenke sujeita ba kontrolu sanitáriu, mantein nafatin obrigatóriamente izolamentu profilátiku (kuarentena) no halo teste COVID-19 ba sidadaun sira ne’ebé hakarak tama iha país no hatudu sintoma ka iha ona kontaktu ho infetadu.

Enkuantu, despeza sira ne’ebé relasiona ho izolamentu profilátiku bainhira kumpre iha estabelesimentu saúde, rezidénsia ka sentru izolamentu privadu, sei selu rasik.

Aleinde ne’e, nafatin mantein proibisaun ba pasajen fronteira terrestre ba fins tradisionál sira ka kostumeiru no mós asesu merkadu ne’ebé regula ona no mantein nafatin sansaun sira ne’e.

“Ema estranjeiru ne’ebé hakarak tama iha territóriu nasionál liuhosi fronteira terrestre, tenke sujeitu ba autorizasaun prévia,” nia akresenta.

Portavós Governu ne’e dehan, durante períodu vijénsia EE, lisensa hotu, autorizasaun, atus administrativu sira seluk no dokumentu sira mantein válidu independentemente maski prazu liu ona.

Ba sidadaun  nasionál no estranjeiru ne’ebé tama no sai ilegál, tenke selu koima inklui selu rasik konfinamentu obrigatóriu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here