Selebrasaun eukaristia kalan Natál, 24 dezembru, iha Kapela Nossa Señora Do Carmo, Luro-Mata, Comoro, Dili. Imajen Tatoli/Francisco Simões

DILI, 24 dezembru 2020 (TATOLI) –Selebrasaun eukaristia kalan Natál, 24 dezembru, tinan ne’e, iha Kapela Luro-Mata, Comoro, Dili, hala’o iha situasaun ksolok no paz. Maibé misa Natál kalan ne’e diferente ho kalan Natál, tinan sira liubá ona.

Notísia Relevante : Jezús moris iha bibi-luhan reprezenta Maromak Nia simplisidade

Sarani balun uza máskara iha missa kalan Natál, 24 dezembru 2020. Imajen/Espesiál

Iha misa kalan Natál, 24 dezembru ne’e, sarani sira ua’in ba ua’in hosi Bairru Luro-Mata no balun mai hosi Fatuhada, halibur no hakonu resin arredores  kapela simples no ki’ik ne’ebé nia mahein mak Inan Nossa Señora do Carmo.

Molok entrada ba selebrasaun liturjia misa kalan Natál  ne’e, leigu sira ne’ebé responsavel liturjia nian fó sai kedas avizu importante atu sarani hotu kumpre hodi hadook aan hosi  propagasaun peste letál COVID-19.

Amu selebrante, Pe. Jose Vataparambil, SDB  ho akólitu sira, molok hakat sa’e ba altar ne’ebé akompaña ho hananu entrada nian, responsavel liturjia sira fó sai uluk avizu hanesan “giaun” atu hotu-hotu banati tuir durante selebrasaun misa to’o remata, tanba parte sira simu ona informasaun no aviza hosi Ministériu Saúde (MS) kona-ba situasaun COVID-19 ne’ebé to’o horiseik, Timor-oan na’in-hitu (7) konfirmadu COVID-19.

Pasiente COVID-19 na’in-hitu ne’e izola ona iha Sala Izolamentu Vera Cruz Dili no Sala Izolamentu Rejiaun Administrativa Espesiál Oe-Cusse Ambeno (RAEOA).

“Ho avizu hosi Ministériu Saúde nian ne’e, ami fó hanoin fali ba sarani sira hotu atu kuidadu aan nafatin. Ami fó hanoin hela atu orasida mai simu komuñaun ho loke lima rua (liman karuk iha leten no liman loos iha okos). Amu sira sei la hatama ostia ba ita ida-idak nia ibun maibé ita simu ho liman rua de’it. seluk fali mak ita sei la mai rei direita ilas kosok oan Jezús Kristu, maibé ita forma hanesan ba komuñaun hodi taka liman hakru’uk fó vena de’it ba ilas Jezús Kristu ne’ebé padre no madre sira kaer iha sira liman.” Ne’e mak avizu no “giaun” balun ne’ebé komisaun liturjia sira fó sai  ho intensaun atu kumpre ba  protokolu saúde.

Ho prezensa sarani ua’in ba ua’in, la iha espasu natoon atu asegura distánsia sosiál ka distánsia fíziku (mínimu metru ida). Mézmu nune’e, maioria sarani sira, ho idade labarik, joven no ferik-katuas, kumpre “orden” no “giaun” ne’ebé  fó sai hosi komisaun liturjia.

Amu Jose Vataparambil, SDB iha nia lia menon molok ensera misa eukaristia kalan Natál nian fahe mós informasaun uitoan kona-ba situasaun COVID-19 iha Eropa no Reinu Unidu.

“Ita la imajina, tinan ne’e, ita tenke halo festa Natál nakonu ho presaun COVID-19 nian. Maibé realidade hatudu mai ita liuhosi informasaun sira mídia sira nian katak iha Reinu Unidu no nasaun balun iha Eropa komesa atrapalla tanba sira hetan tiha ai-moruk vasinasaun, maibé mosu fali tan Coronavirus foun  iha sira-nia nasaun,” Amu Jose Vataparambil haktuir.

Nia hateten, iha nasaun sira Eropa balun, ema mate ua’in ona tanba Coronavirus. Aat liu tan, Amu hosi Kongregasaun Salezianu Don Bosco ne’e tenik, rai balun avansadu no rikeza, la iha ona ema atu hakoi ema-mate tanba Coronavirus, basá ema-sira durante hakoi ema-mate ne’e mós mate hotu ona.

“Ita Timor rai ki’ik loos, ema mós uitoan de’it. Ita reza atu Maromak soi ita hotu hosi peste letál COVID-19 ne’e,” Amu Jose Vataparambil, hateten hodi tatoli mós ba sarani sira hotu kumpre nafatin protokolu saúde ba luta kontra COVID-19.

Iha serimónia misa kalan Natál iha kapela Nossa Señora do Carmo ne’e, abitante no madre balun uza máskara.

Notísia Relevante : Juventude Luro-Mata monta lampu Natál metru 100-liu

Jornalista       : Francisco Simões

Editór             : Agapito dos Santos

HAKEREK NO HATÁN

Please enter your comment!
Please enter your name here