Lampu Natál nia naroman ho kooris oioin hanesan arkuiris iha Travesa Samodok, Bairru Luro-Mata, Comoro, Dili. Imajen Tatoli/Eugénio Pereira

DILI, 20 dezembru 2020 (TATOLI) “We wish you a Merry Christmas and a Happy New Year..”  Kansaun Natál nian komesa toka iha uma-uma sira no iha loja ho supermerkadu sira iha sidade Dili nia fuan no sikun sira.

Juventude sira Bairru Luro-Mata monta lampu Natál ho distánsia metru 100-liu iha Travesa Samodok. Imajen Tatoli/Eugénio Pereira

Arbore Natál nian komesa monta ona iha jardín sira iha Dili laran no ornamentu klásiku Natál nian mós enfeita ona iha sidade kapitál Timor-Leste ne’e nia futar oin.

Ksolok Natál nian komesa ona sente iha aldeia, suku, postu administrativu no munisípiu hotu iha Timor-Leste.

Loos. Hela de’it ona loron lima, mundu tomak selebra loron boot Natál, 25 dezembru 2020, loron Nai Maksoin Jezús Kristu moris iha mundu iha bibi-luhan iha Rai Belem.

Mezmu tinan ne’e, atmosfera Natál iha sidade Dili lahanesan tinan sira liubá, maibé juventude sira, halo esforsu nafatin ho sira-nia kbiit hodi mantein lori atmosfera Natál ba iha sira-nia uma, sira-nia bairru no sira-nia sosiedade.

Se tinan sira liubá, sidade Dili barak tebes hakonu iha estada ibun sira iha kada bairru nian ho prezépiu Natál, maibé tinan ne’e prezépiu Natál kuaze ema la halo. Maibé la halakon juventude  sira-nia kriatividade atu lori situasaun Natál nian iha sira-nia bairru laran.

Labarik na’in-rua iha uma kain balun iha Dili orna ona arbore Natál iha sira-nia uma-laran. Imajen Tatoli/Eugénio Pereira

Iha Bairru Luro-Mata, Aldeia 03, Suku Comoro, Postu Administrativu Don Aleixo, Munisípiu Dili, juventude sira la halo ka la harii  prezépiu Natál, hanesan tinan sira liubá. Sira hola inisiativa hodi husu apoiu inan-aman no maun-alin sira-nian  arranja lampu Natál hodi monta iha Travesa Samodok ne’ebé nia distánsia naruk purvolta metru 100-liu.

“Ami juventude Travesa Samodok nian hola inisiativa halibur malu no tau kbiit finanseiru oituan-oituan hodi sosa lampu LED Natál nian, fiu sira, tali-ráfia, isolasi eletrisidade, saklar eletrisidade nian  no seluk tan, hodi monta lampu Natál iha ami nia Travesa Samodok atu ita sente netik atmosfera Natál nian,” haktuir Lilo, juventude ida hosi Aldeia 03 bainhira dada-lia ho Agência Tatoli, domingu kalan, bainhira sira mobiliza malu monta hela lampu Natál nian iha Travesa Samodok, Luro-Mata, Comoro, Dili.

La iha ema ida mak inisia no organiza juventude lubun Bairru Luro-Mata hirak-ne’e hodi monta lampu Natál iha estrada Travesa Samadok nian. Maibé ho de’it fiar-malu no rona-malu, sira kontribui monta lampu Natál ne’ebé iha tempu kalan la’o iha okos furak tebes.

Karik iha tempu kalan tuku 19:00 Otl, haku’ur vizita mai Bairru Luro-Mata, bele tuun mai Travesa Samadok, iha kedas Kapela Luro-Mata nia sorin-balun, hodi  sente lampu LED Natál nia roman ho kooris oioin hanesan arkuiris.

Jornalista     : Eugénio Pereira

Editór             : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here