DILI, 24 dezembru 2020 (TATOLI)—Ekipa COVID-19 husi Ministériu Saúde, kinta (24/12) deteta tan Timoroan na’in hitu konfirmadu COVID-19.

Ministra Saúde (MS), Odete Maria Freitas Belo, informa pasiente coronavirus na’in hitu ne’e izola ona iha Sala Izolamentu Vera Cruz Dili, no Sala Izolamentu Rejiaun Administrativa Espesiál Oe-Cusse Ambeno (RAEOA).

Notísia Relevante :Timoroan na’in rua hetan coronavirus

“Ohin(24/12) ita hetan kazu tolu horiseik (23/12) hetan kazu ida, iha RAEOA iha kazu tolu no antes ne’e ita detekta uluk kazu rua entaun hamutuk kazu sia ona tanba ne’e ha’u la bele  informa klaru loloos husi sira-nia viajén husi ne’ebé  maibé ita iha informasaun ida ne’ebé mak seidauk kompletu didiak ha’u espera katak  ita sei hetan dadus hotu,’’ Governante informa durante konferénsia imprensa iha SAMES Dili, kinta ne’e.

Sidadaun na’in hitu ne’ebé hetan moras coronavirus ne’e, na’in haat deteta iha kuarentena obrigatóriu Tasi-Tolu no na’in tolu iha Kuarentena Oe-Cusse.

Ekipa vizilánsia Ministériu Saúde daudaun ne’e hala’o hela screening ba kuarentena obrigatóriu Tasi-Tolu.

“Sidadaun sira ne’ebé mak iha kuarentena Tasi-Tolu hamutuk 168 no ami halo fila fali screening  ba sira hodi hatene tanba sira ohin sira laiha distánsia sosiál ba malu tanba kazu ne’e importadu no ita seidauk iha transmisaun lokál,” nia hateten.

Ho kazu foun ne’e, Ministra Saúde apela ba sidadaun hotu-hotu ne’ebé maka sei selebra misa natal no tinan foun no mós halo movimentu iha fatin públiku tenke uza máskara hodi prevene transmisaun COVID-19.

“Orsida kalan festeza natal husu ba ita hotu  keta haluha uza máskara no halo distánsia sosiál ba malu atu nune’e bele prevene moras COVID-19 tanba Ministériu Saúde ohin rejista tan kazu foun hitu, haat iha kuarentena Tasi-Tolu no tolu iha RAEOA,” Governante apela.

Entretantu, iha loron 22 fulan-dezembru ne’e Ministériu Saúde deteta uluk Sidadaun Timoroan mane na’in rua, ida ho tinan 43 no ida seluk tinan 24 mak hetan moras coronavirus

Notísia Relevante :Pasiente COVID-19 alta husi sala izolamentu

Jornalista :Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here