DILI, 23 dezembru 2020 (TATOLI)-Ekipa Fiskalizasaun Konjunta (EFK) apela ba utilizadór viatura Estadu hotu iha instituisaun Estadu atu destaka karreta Estadu hotu iha fatin servisu durante loron feriadu Natál, 24-27 dezembru 2020 ho tinan foun, 01-03 janeiru 2021.
Notísia Relevante : Labele utiliza patrimóniu Estadu iha Natál no Tinan Foun
Ekipa konjunta ne’e kompostu hosi Komisaun Anti-Korrupsaun (CAC), Komisaun Funsaun Públika (CFP), Polísia Nasionál Timor-Leste (PNTL), Diresaun Nasionál Transporte no Terrestre (DNTT), Diresaun Nasionál Patrimóniu Estadu (DNPE).
Liu hosi konferénsia imprensa, ohin, iha edifísiu CFP, Dili, pontu vokál CAC, Euclides Vidal Madeira, lori EFK nia naran apela ba utilizadór viatura Estadu hotu atu destaka karreta Estadu hotu iha fatin servisu, hahú hosi loron 24 to’o 27 no hosi loron 30 dezembru 2020 to’o ba loron 03 janeiru 2021.
EFK husu mós ba responsavel lojístika sira iha instituisaun Estadu hotu atu implementa sirkulár ne’ebé mak EFK fó sai nune’e uainhira utilizadór balun la kumpre atu informa ba EFK.
“Ekipa konjunta mós sei halo monitorizasaun ba utilizasaun karreta Estadu durante loron feriadu Natál no tinan foun hamutuk ho PNTL,” Euclides Madeira afirma.
Nia afirma, ba utilizadór ne’ebé la kumpre sei hetan responsabilidade administrativu no kriminál.
EFK sei halo koordenasaun ho PNTL liuhosi Unidade Tránzitu iha territóriu hodi halo prosesu ba utilizasaun viatura Estadu durante feriadu Natál no tinan foun.
“Husu mós ba públiku atu halo mós kontrolu ba utilizasaun viatura Estadu durante loron feriadu ne’e liu hosi hasai fotografia no video hodi lansa iha mídia sosiál no mós pájina Facebook CAC nian hodi prosesa tuir lei,” Euclides tenik.
Unidade Tránzitu Nasionál PNTL, Inspetór Xefe, Inocêncio da Costa Freitas, hateten, besik ba loron Natal ho tinan foun Komandante Jerál PNTL, Komisáriu Faustino da Costa, mós hatún ona sirkulár ba munisípiu hotu atu kumpre hodi halo operasaun ba sirkulasaun transporte públiku hodi evita asidente nune’e mós ba karreta Estadu ne’ebé utiliza la tuir fin ka ba interese privadu.
Biban ne’e, Komisáriu ba Asuntu Disiplinár CFP, Fausto Freitas da Silva, mós husu ba servidór Estadu hotu atu kumpre dekretu lei númeru 8/2003, loron 18 juñu kona-ba distribuisaun no utilizasaun viatura Estadu nian hodi uza karreta no motór Estadu iha tempu ne’ebé servisu.
“Ba sirkulasaun viatura Estadu ne’ebé la iha autorizasaun sei prosesa, exeptu ba sirkulasaun karreta servisu operasionál hanesan ospitál no sira seluk,” Fausto Freitas da Silva afirma.
Jornalista : Nelson de Sousa
Editór : Francisco Simões
