DILI, 22 dezembru 2020 (TATOLI)-Ekipa konjunta kompostu hosi Komisaun Anti-Korrupsaun (CAC), Polísia Nasionál Timor-Leste (PNTL), Diresaun Patrimóniu Estadu, Komisaun Funsaun Públika (CFP) sei distribui sirkulár ida ba órgaun Estadu sira atu la bele utiliza patrimóniu Estadu (karreta no motór) iha loron feriadu Natál 2020 no tinan foun 2021.
Notísia Relevante : EFK sei manda karta xamada ba membru Governu uza patrimóniu Estadu iha finadu
“Kuandu identifika funsionáriu sira ne’ebé la kumpre hodi utiliza karreta no motór Estadu ba interese pesoál maka sei prosesu tuir dalan legál,” Adjuntu Komisáriu CAC, Luis Oliveira Sampaio, halo alerta ida liuhosi entrevista ho jornalista Agência Tatoli, ohin, iha nia edifísiu CAC, Dili.
Nia informa katak polísia liuhosi Unidade Tránzitu mós sei halo atuasaun iha territóriu kuandu haree veíkulu Estadu movimenta iha loron feriadu, exeptu ba sirkulasaun karreta servisu operasaun hanesan ospitál no seluk tan ho mós sira ne’ebé iha autorizasaun servisu.
Luis Oliveira, hateten atuasaun ne’e atu asegura patrimóniu Estadu nian bele utiliza saida mak tuir lei dehan tanba ne’e enkoraja dirijente sira atu kaer metin ba prinsípiu legalidade.
Notísia Relevante : PDHJ Nota Membru Governu Balun Uza Duni Patrimóniu Estadu Iha Kampaña Eleitorál
Jornalista : Nelson de Sousa
Editór : Francisco Simões
