Ró Nakroma avaria, halo pasajeiru hein iha Portu Dili hodi halo viajen ho ró seluk, tersa (22/12). Imajen TATOLI/António Gonçalves

DILI, 23 dezembru 2020 (TATOLI)—Diretór Ró Success, Sansaun Gomes, hateten ró ne’e prontu fasilita pasajeiru halo viajen husi Dili bá Oé-cusse no Ataúru durante loron boot, hafoin Ró Berlin Nakroma labele kontinua halo operasaun tanba mákina avaria.

“Natál no tinan foun hela de’it loron hirak tan, purtantu ami-nia kooperasaun di’ak entre Autoridade Portuáriu Timor-Leste (APORTIL) no Ministériu Transporte no Komunikasuan (MTK), sira bolu ona ha’u atubele buka solusaun hamutuk atende ita-nia populasaun sira,” Diretór ne’e dehan ba Agência TATOLI, iha ninia knaar fatin, Portu Dili, kuarta ne’e.

Notísia Relevante: Mákina avaria, Ró Nakroma tula pasajeiru-400 lakonsege viajen to’o Oé-cusse

Maski nune’e, nia hameno ba pasajeiru atu labele lori sasán todan hanesan karreta no sasán todan seluk.

“Ami-nia ró redús ona kargu, ami la tula sasán iha ró laran, ita bele akomoda ita-nia populasaun sira maibé tanba loron boot ita tenke komprende populasaun sira-nia nesesidade,” nia akresenta.

Ró Success halo operasaun semana ida dala-rua bá Oé-cusse no dala-ida bá Ataúru.

“Tanba Ró Nakroma hetan problema téknika maka ami haree atu oinsá hafoin loron 25, iha loron 26 ne’e ami halo fali viajen bá Oé-cusse atu atende maluk sira ba pasa loron boot tinan foun no bele ba sira pasa Natál iha ne’ebá hotu hakarak filafali mai, iha loron 27 bele aranka husi Oé-cusse mai Dili,” nia hatutan.

Iha loron 28 dezembru, Ró Success aranka husi Dili bá Oé-cusse atu atende filafali tinan foun.

Tuir Dirijente ne’e, Ro Success iha kapasidade bele tula pasajeiru husi 500 to’o 1.000.

Diretór ne’e haktuir, durante tinan lima halo operasaun, kuaze iha loron Natál no tinan foun sempre akontese movimentasaun barak.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here