Ró Nakroma avaria, halo pasajeiru hein iha Portu Dili hodi halo viajen ho ró seluk, tersa (22/12). Imajen TATOLI/António Gonçalves

DILI, 22 dezembru 2020 (TATOLI)—Ró Nakroma iha segunda (21/12) lorokraik, tula pasajeiru hamutuk 400 hodi halo viajen husi Dili bá Oé-cusse maibé tanba mákina avaria iha dalan klaran, tripulante sira deside filafali hodi atraka iha Portu Dili maizumenus tuku 8 kalan.

Diretór Nasionál Kabotajen husi Ministériu Transporte no Komunikasaun (MTK), Feliciano da Costa Correia, konfirma tanba mákina a’at, daudaun Ró Nakroma la halo operasaun hanesan bain-bain hodi lori pasajeiru.

Ró Nakroma avaria, halo pasajeiru hein iha Portu Dili hodi halo viajen ho ró seluk, tersa (22/12). Imajen TATOLI/António Gonçalves

“Loos duni horikalan tuku 8, ha’u mós simu informasaun husi ha’u-nia tripulante sira kona-ba kondisaun ró ne’ebé labele halo viajen to’o Oé-cuse tanba mákina avaria,” Diretór ne’e informa ba Agência TATOLI, iha ninia knaar fatin, Portu Dili, tersa ne’e.

Nia esplika, mákina ró ne’ebé a’at pertuba labele kontinua halo viajen, tanba ne’e parte kompetente sei halo koordenasaun hodi rezolve.

“Ha’u seidauk iha konfirmasaun loloos bainhira maka atu hadi’a mákina ne’e, maibé provizoriamente ami halo hela koodenasaun  ho  Ró Success atubele fasilita tula ita-nia pasajeiru sira ne’ebé la konsege halo viajen horikalan,” nia akresenta.

Tuir Dirijente ne’e, provizóriumente parte tékniku sira sei esforsu atubele nafatin atende públiku iha loron boot (Natál no tinan foun).

Ró Nakroma avaria, halo pasajeiru hein iha Portu Dili hodi halo viajen ho ró seluk, tersa (22/12). Imajen TATOLI/António Gonçalves

“Ha’u seidauk rona informasaun detallu, maibé daudaun mákina iha ona no tékniku halo hela identifikasaun,” Feliciano hatutan.

Entertantu, bazeia ba desizaun Governu nian ne’ebé Autoridade Portuáriu ezekuta, Ró Berlin Nakroma no Ró Success halo viajen husi Dili bá Ataúro no Dili bá Oé-cusse semana ida dala-ida,

Ró Berlin Nakroma halo operasaun iha loron kinta no Ró Success halo operasaun iha loron domingu.

Jornalista: Natalino Costa

Editora: Julia Chatarina        

HAKEREK NO HATÁN

Please enter your comment!
Please enter your name here